نگراں وزیراعظم انوار الحق کاکڑ نال ایرانی سفیر دی ملاقات

اسلام آباد۔1ستمبر(اے پی پی) نگراں وزیر اعظم انوار الحق کاکڑ نال پاکستان اچ ایران دے سفیر رضا امیری مغدم ملاقات کیتی اے ۔ ملاقات اچ ݙوہیں ملکاں وچال نیڑے بھرپی دے تعلقات تے زور ݙیندے ہوئیں نگراں وزیراعظم انہاں تعلقات کوں مزید تکڑا تے گھاٹا بݨاوݨ سانڳے پاکستان دے مضبوط عزم دا اعادہ کیتے۔ وزیراعظم آفس دے میڈیا ونگ توں جاری پریس ریلیز موجب نگراں وزیراعظم انوار الحق کاکڑ ݙوہیں ملکاں وچال اقتصادی اتے سلامتی دے شعبیں اچ تعاون ودھاوݨ تے توجہ دی لوڑھ تے زور ݙتا ۔ نگراں وزیر اعظم ایں ڳالھ تے وی روشنی پاتی جو مند پشین سرحدی بازار دا اڄوکا افتتاح نہ صرف سرحدی علاقیں دی معاشی ترقی اچ معاون ثابت تھیسی جڈاں جو ݙوہیں ملک دے لوکاں دی بہتری سانڳے کم کرݨ دے اجتماعی عزم دا مظہر وی ثابت تھیسی ۔ ایرانی صدر دی ‘پڑوسی ساریں توں پہلے ‘ دی  پالیسی دے حوالے نال نگراں وزیراعظم آکھیے ایرانی صدر دی اے پالیسی علاقائی ترقی اتے رابطے سانڳے پاکستان دے وژن توں پوری طرح ہم آہنگ اے۔ نگراں وزیر اعظم ݙوہیں ملکاں دے وکھرے جغرافیائی محل وقوع توں فیدہ چاوݨ دی اہمیت تے زور ݙتا تاں جو ودھ توں ودھ تجارت دے ذریعے علاقائی امن، رابطے تے خوشحالی دے سانجھے مقصد کوں ودھایا ونڄ سڳے ۔ ایرانی سفیر ایں موقع تے آکھیے ایران ݙوپاسے تعلقات خاص طور تے معیشت، توانائی اتے سلامتی دے شعبیں اچ اڳوں ودھاوݨ چاہندے۔