حڄاج دے سوکھ کیتے موبائل ایپ دے نال نال حج اخراجات ڳھٹاوݨ دی کوشش اے، وفاقی وزیر انیق احمد

کراچی۔ 22 نومبر(اے پی پی)نگراں وفاقی وزیر مذہبی امور انیق احمد آکھیے جو حکومت حجاج دی سہولت کیتے موبائل ایپلی کیشن دے اجرا دے نال سہولیات تے سمجھوتہ کیتے بغیر حج اخراجات ڳھٹاوݨ دی کوشش کریندی پئی اے۔ حاجی کیمپ کراچی اچ میڈیا نال الیندے انہاں آکھیا جو حاجی کیمپ اچ جاج کوں تربیت اتے سہولیات ملدن جیکؤں اپ گریڈ کرݨ دی لوڑھ اے، حکومت حجاج کوں مفت کیوآرکوڈ، 30کلو گرام دا سوٹ کیس ݙیسی ڄیڑھا انہاں دا سامان ڳولݨ اچ ہتھ ونݙیسی۔ انہاں آکھیا جو وزارت آئی ٹی دے تعاون نال، وزارت مذہبی امور ہک موبائل ایپلی کیشن شروع کریسی جیندے نال حجاج دی درخواست دے اندراج، حج دی تکمیل، وطن واپسی تئیں رہنمائی کریسی۔ انہاں آکھیا جو سستا حج ساݙی ترجیح اے جیکوں یقینی ٻݨایا ویسی ڄݙاں جو مختصر قیام دا آپشن چݨݨ آلیاں کؤں وی اخراجات اچ رعایت ݙتی ویسی، پراݨے منیٰ دے علاقے اچ اپݨی ڄاہ ڳھنݨ دی کوشش کریسوں جو اے ودھ نیڑے اے۔ انہاں آکھیا جو اسلام آباد اچ امیگریشن دی سہولت موجود ہئی ڄیکوں کراچی ریجن تئینو دھا ݙتے تیکھے لاہور، پشاور اتے کوئٹہ اچ وی اے سہولت ملسی۔