پاکستان تے اٹلی وچال مختلف شعبیں اچ تعاون، سرمایہ کاری اتے تجارتی رابطے ودھاوݨ دی لوڑھ اے ، نگران وزیراعظم انوار الحق کاکڑ

اسلام آباد۔12جنوری (اے پی پی) نگران وزیراعظم انوارالحق کاکڑ آکھیے جو پاکستان اتے اٹلی وچال زراعت ، ٹیکنالوجی ، تعلیم اتے سیاحت سودھے مختلف شعبیں اچ تعاون، سرمایہ کاری اتے تجارتی رابطے ودھاوݨ دی لوڑھ اے ۔ اے ڳالھ پاکستان اچ اٹلی دے سفیراینڈریس فرارس کوں آکھی اے جنہاں انہاں دے نال الوداعی ملاقات کیتی۔ ملاقات اچ نگران  وزیراعظم ݙوپاسے اقتصادی تعلقات اتے مختلف شعبیں اچ تعاون کیتے اٹلی دے سبکدوش تھیوݨ آلے سفیر دی خدمات دی تعریف کیتی ۔ انہاں آکھیے جو اٹلی نال پاکستان دے پراݨے دوستانہ تعلقات ہن۔ انہاں ݙوہیں ملکاں وچال مائیگریشن، زرعی ٹیکنالوجی، تعلیم اتے سیاحت اچ تجارت، سرمایہ کاری اتے تعاون کوں ودھارا ݙیوݨ دی لوڑھ تے زور ݙتا۔اٹلی دے سفیر پاکستان اچ قیام دے دوران  مثالی تعاون تے اظہار تشکر کیتا۔ انہاں وزیراعظم کوں اپݨی سفارتی مدت دے دوران تھیوݨ آلی اہم پیش رفت بارے ݙسایا۔ انہاں  اٹلی دی اقتصادی ترقی اچ پاکستانیاں دے خدمات دی تعریف کیتی ۔ وزیر اعظم سبکدوش تھیوݨ آلے سفیر دی آندی ذمہ واریاں سانڳے نیک خواہشات دااظہار کیتے۔