وفاقی وزیر داخلہ محسن نقوی دی صدارت اچ  سی ڈی اے  آفس اچ اہم اجلاس

اسلام آباد۔5جولائی(اے پی پی) وفاقی وزیر داخلہ محسن نقوی دی صدارت اچ سی ڈی اے آفس اچ ھک اہم اجلاس تھئے جیں اچ اسلام آباد کوں عالمی معیار دا شہر بݨاوݨ سانڳے اہم فیصلے کیتے ڳئن ۔ وزیر داخلہ دی ہدایت تے ماحولیاتی آلودگی گھٹ کرݨ سانڳے سی ڈی اے اڳوں صرف الیکٹرک بائیکس مل گھنسی ۔ ایں توں انڄ اسلام آباد دے شہریاں سانڳے ماحول دوست الیکٹرک بساں چلائیاں ویسن ۔ وزیرداخلہ پٹرول موٹر سائیکل مل گھنݨ تے پابندی لاݙتی اے ۔ اسلام آباد دے شہریاں کوں انٹرنیشنل سٹینڈرڈ دی ایمرجنسی سروسز ݙتیاں ویسن۔ ایمرجنسی سروسز کوں ایم سی آئی نال سی ڈی اے کوں منتقل کرݨ دا فیصلہ کیتا ڳئے ۔ کیپٹل واسا دا قیام وی وختی عمل اچ گھن آیا ویسی ۔ ایندے توں انڄ کیپیٹل ویسٹ مینجمنٹ کمپنی دے قیام سانڳے متعلقہ امور کوں وختی حتمی شکل ݙتی ویسی ۔ وفاقی وزیر داخلہ آکھیے اسلام آباد اچ ٹریفک دے مسئلے کوں گھٹ کرݨ سانڳے سرینا چوک انڈر پاس اتے ایف نائن پارک چوک  فلائی اوور  منصوبیں تے تعمیراتی کم وختی شروع کر ݙتا ونڄے ۔ لمبی مدت توں زیر التوا ایکسپریس وے دے منصوبے کوں مکمل کرݨ سانڳے کم دی رفتار تکھی کیتی ونڄے ۔ انہاں مزید آکھیے اسلام اباد دے کئی سال توں نان ڈویلپ سکیٹرزاچ ترقیاتی کماں کوں مکمل کرتے لوکاں کوں قبضہ ݙتا ویسی ۔ 17 سال توں تعطل دا شکار اسلام آباد ماڈل جیل تے کم تکھے جاری اے ۔ پہلے مرحلے کوں مقررہ مدت اچ مکمل کیتا ویسی ۔ وزیر داخلہ آکھیے اسلام آباد اچ بزنس فیسلیٹشن سنٹر بݨائے ویندے پئن جتھاں سرمایہ کاراں کوں سہولتاں ھک چھت تلے ݙتیاں ویسن ۔ سیکٹر ایچ سولہ اچ ہیلتھ ٹاور سانڳے زمین دیالاٹمنٹ کرݙتی ڳئی اے۔ وزیر داخلہ دی ریکارڈ ٹیکس وصولی تے چیئرمین سی ڈی اے سودھے پوری ٹیم کوں مبارخ ݙتی لیکن نال اے وی چتاوݨی ݙتی جو صرف پلاٹ اتے زمین ویچ تے کوئی ادارہ نی چل سڳدا ، ضروری اے جو ادارے دے اثاثے ودھائے ونڄن ۔ ایں سلسلے اچ وزیر داخلہ ہدایت کیتی انوسمنٹ پلان بݨا تے 7 ݙینھ اچ پیش کیتا ونڄے ۔ اجلاس اچ ترقیاتی منصوبیں تے پیشرفت دا جائزہ وی ڳھدا ڳئےجیندے اچ کری انکلیو،فیڈرل سیکرٹریٹ دی عمارت دی تزئین و آرائش، ڈپلومیٹک انکلیو اتے سمارٹ پارکنگ دے منصوبیں تے پیشرفت تے وی غور کیتا ڳئے۔ چیئرمین سی ڈی اے محمد علی رندھاوا وفاقی وزیر داخلہ کوں مختلف منصوبیں تے تفصیلی بریفنگ ݙتی۔ اجلاس ماچ چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن تے سی ڈی اے دے سارے ممبران شرکت کیتی۔