روسی وزیرِ داخلہ دا 4 ݙینھ دا دورۂ پاکستان مکمل، ماسکو روانہ

اسلام آباد۔15اکتوبر(اے پی پی)روس دے وزیرِ داخلہ ولا دیمیر کولاکولتسیف پاکستان دا چار ݙینھ دا اہم دورہ مکمل کرتے ماسکو روانہ تھی ڳئن۔ وفاقی وزیرِ داخلہ محسن نقوی روسی ہم منصب کوں اسلام آباد ایئرپورٹ تے الوداع کیتا۔ ایں موقع تے چیف کمشنر اسلام آباد، آئی جی اسلام آباد پولیس تے ٻئے اعلیٰ حکام وی موجود ہن۔ روسی وزیرِ داخلہ، وفاقی وزیرِ داخلہ محسن نقوی دی خصوصی دعوت تے پاکستان تشریف گھن آئے ہن۔ اپݨے 4 ݙینھ دے دورے تے انہاں صدرِ مملکت آصف علی زرداری، وزیراعظم محمد شہباز شریف، فیلڈ مارشل سید عاصم منیر، نائب وزیراعظم و وزیرِخارجہ اسحاق ڈار تے وفاقی وزیرِ داخلہ محسن نقوی سودھے ٻئی اعلیٰ قیادت نال تفصیلی ملاقاتاں کیتیاں۔ دورے دے دوران پاکستان تے روس وچال منظم جرائم دے سدِباب تے سکیورٹی تعاون دے ودھارے دے معاہدے تے دستخط وی کیتے ڳئے۔ روانگی دے موقع تے روسی وزیرِ داخلہ پاکستان اچ شاندار مہمان نوازی تے اپݨے ہم منصب دا شکریہ ادا کریندے آکھیا جو او پاکستان توں خلوص تے محبت گھن تے واپس ویندے پئن۔ ایں موقع تے وفاقی وزیرِ داخلہ محسن نقوی دا آکھݨ ہئی جو روسی ہم منصب دا اے دورہ ݙوہیں ملکاں دے سانجھے تعلقات کوں اڳوں ودھاوݨ اچ اہم سنگِ میل ثابت تھیسی۔