وزیر اعظم دا ای پروکیورمنٹ منصوبہ ہک مہینے اچ مکمل کرݨ دی ہدایت، اجلاس نال خطاب

اسلام آباد۔24اگست(اے پی پی)وزیراعظم محمد شہباز شریف ای پروکیورمنٹ منصوبے کوں ہک مہینے اچ مکمل کرݨ دی ہدایت کریندے آکھیے جو پروکیورمنٹ سانڳے شکایات اتے تحفظات دے حل دا نظام مؤثر ٻݨاوݨ کیتے تھرڈ پارٹی ویلیڈیشن کرائی ونڄے۔ او اسلام آباد اچ الیکٹرانک پروکیورمنٹ، ای-پاک ایکیوزیشن اینڈ ڈسپوزل سسٹم بارے جائزہ اجلاس دی اڳواݨی کریندے پئے ہن۔ وزیر اعظم آکھیا جو حکومت خریداریاں دا شفاف طریقہ کار ݙیوݨ کیتے اقدامات کریندی پئی اے، پروکیورمنٹ سانڳے شکایات اتے تحفظات دے حل دا نظام مؤثر ٻݨاوݨ کیتے تھرڈ پارٹی ویلیڈیشن کرائی ونڄے ایں سانڳے نظام کوں پروکیورنگ ایجنسی دے ماتحت نئیں ہووݨا چاہیدا، شفافیت کیتے قواعد و ضوابط اچ ترمیم کیتی ونڄے۔ انہاں 2 ارب روپے توں ودھ دے سارے ترقیاتی منصوبیاں دی تھرڈ پارٹی ویلیڈیشن کراوݨ دی ہدایت کیتی۔ وزیر اعظم منصوبے تے عملدرآمد اچ سستی، کم دے معیار اتے پراسس دے نامکمل ہووݨ تے ناراضگی ݙکھائی۔

اجلاس اچ بریفنگ ݙتی ڳئی جو اے منصوبہ پبلک پروکیورمنٹ ریگولیٹری ورلڈ بینک دی فنڈنگ نال 2017 اچ شروع کیتا ہا جیندی کل لاگت 45 ملین امریکی ڈالرز اے، ایں سانڳے وفاقی حکومت دی 37 وزارتاں اتےر 301 پروکیورنگ ایجنسیاں اچ ای پروکیورمنٹ دا نفاذتھی چکیے، پی پی آر اے پروکیورنگ ایجنسیوں دے 8988 آفیشلز کوں ای پروکیورمنٹ دی تربیت ݙتی ڳئی اے، وفاقی حکومت دا ای پروکیورمنٹ بارے حجم تقریباً 1551 بلین روپے اے، ای پروکیورمنٹ بارے پنجاب، سندھ ، خیبر پختونخوا اتے آزاد جموں و کشمیر حکومتاں نال مفاہمتی یادداشتاں تے دستخط وی کیتن۔ اجلاس اچ وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وزیر پیٹرولیم مصدق ملک، وزیراعظم دے کوآرڈینیٹر رانا احسان افضل اتے متعلقہ اعلیٰ سرکاری افسران شرکت کیتی۔