برآمدات اچ وادھے نال معاشی ترقی کیتے عملی اقدامات تھیندے پئن، مختلف ورکنگ گروپس دیاں تجویزاں تے عملدرآمد کیتا ویسی، وزیراعظم محمد شہباز شریف

اسلام آباد۔2 دسمبر (اے پی پی)وزیراعظم محمد شہباز شریف آکھیے جو برآمدات اچ وادھے نال معاشی ترقی کیتے عملی اقدامات تھیندے پئن، مختلف ورکنگ گروپس دیاں تجویزاں تے عملدرآمد کیتا ویسی، کاروبار اتے مضبوط معیشت نال ہی ٹیکس آمدن اچ وادھا ہوسی۔ منگل کوں وزیراعظم آفس دے میڈیا ونگ توں جاری بیان موجب، انہاں اے ڳالھ معاشی اصلاحات کیتے نجی شعبے دے ماہرین و کاروباری شخصیات تے مشتمل ٹیکس دے شعبے دی اصلاحات بارے ٻݨائے ڳئے ورکنگ گروپ دے اجلاس دی صدارت کریندے آکھی۔ اجلاس اچ وفاقی وزراء احد خان چیمہ، محمد اورنگزیب، علی پرویز ملک، وزیر مملکت بلال اظہر کیانی، معاون خصوصی ہارون اختر اتے متعلقہ حکام شرکت کیتی۔ اجلاس اچ شامل کاروباری شخصیات و سرمایہ کاراں، پچھلے اجلاس اچ ایکسپورٹ ڈویلپمنٹ سرچارج ختم کرݨ دے احکامات تے وزیر اعظم دا شکریہ ادا کیتا۔ وزیر اعظم آکھیا جو حکومت ٹیکس ݙیوݨ آلے کاروباری لوکاں اتے کمپنیاں کوں قدر نال ݙیھدی اے، طویل مدتی اقدامات دے ذریعے ملک اچ کاروبار کوں بہتر اتے مقابلے دے قابل بݨاوݨ چاہندے ہیں، حکومت پہلے ڈیہنہ توں برآمدات اچ وادھے تے مبنی معاشی ترقی کیتے عملی اقدامات چیندی پئی اے۔ انہاں آکھیا جو نجی شعبے دے ماہرین ولوں جامع تجویزاں پیش کیتاں ڳئن جیندے تے مشکور ہیں، انہاں تجویزاں تے غور دے بعد انہاں کوں قابل عمل بݨاوݨ کیتے وزیر خزانہ دی صدارت اچ ہک کمیٹی ٻݨیدے پئے ہیں، کمیٹی عملی اقدامات تے مبنی لائحہ عمل پیش کریسی۔ اجلاس کوں کارپوریٹ شعبے سودھا مختلف شعبیاں اچ ٹیکساں دی شرح اتے تقابلی جائزہ پیش کیتا ڳیا۔ پاکستان اچ نجی شعبے دی ترقی، برآمدات اتے سرمایہ کاری اچ وادھے کیتے ضروری ٹیکس اصلاحات اتے خطے اچ پاکستانی کاروباری شعبے دی مسابقت ودھاوݨ بارے وی تجویزاں ݙتیاں ڳن۔