وزیر اعظم دا سری لنکا اچ سمندری طوفان نال قیمتی جاناں دے ضیاع تے افسوس، امدادی کاروائیاں کیتے پورا ہتھ ونݙاوݨ دی ہدایت

اسلام آباد۔ 2 دسمبر(اے پی پی) وزیر اعظم محمد شہباز شریف سری لنکا اچ سمندری طوفان نال قیمتی جاناں دے ضیاع تے افسوس کریندے متعلقہ اداریاں کوں سری لنکا اچ امدادی کارروائیاں کیتے ودھ ہتھ ونفاوݨ دی ہدایت کیتی اے۔ منگل کوں وزیراعظم محمد شہباز شریف دی صدارت اچ سری لنکا اچ سمندری طوفان “ڈٹواہ” توں متاثرہ علاقیاں اچ پاکستان ولوں امداد دا جائزہ ڳھنݨ کیتے اجلاس تھیا۔ اجلاس نال خطاب اچ وزیر اعظم آکھیا جو اساں ایںا وکھے ویلھے سری لنکا دی حکومت اَتے عوام دے نال کھڑے ہیں۔ وزیر اعظم آکھیا جو سرچ اینڈ ریسکیو دے مرحلے دے بعد پاکستان متاثرہ علاقیاں دی بحالی اَتے تعمیر نو اچ وی بھرپور کردار ادا کریسی۔ اجلاس کوں سری لنکا دے طوفان متاثرہ علاقیاں اچ پاکستان دیاں جاری امدادی کارروائیاں بارے بریفنگ ݙتی ڳئی جو پاکستان توں اربن سرچ اینڈ ریسکیو ٹیم کَل روانہ تھیسی، اَتے کمرشل بحری جہاز تے مزید امدادی سامان وی کَل ٻھیڄیا ویسی۔ݙسایا ڳئے جو پاک بحریہ دا جہاز سیف سری لنکا اچ تعیناتی دے دوران سیلاب متاثرین کیتے امدادی سرگرمیاں اچ مصروف اے، اَتے جہاز تے موجود ہیلی کاپٹر سری لنکا اچ پنج ݙینھ توں پھسے ہوئے خاندان کوں بچا ڳھدے۔ پاکستان سری لنکا اچ ریلیف اَتے ریسکیو دا کم جاری رکھسی۔