قومی ٹیرف پالیسی ملکی صنعتی پیداوار کوں مثبت انداز اچ سہولت ݙیوݨ کیتے نافذ کیتی ڳئی، وزیر اعظم شہباز شریف دا جائزہ اجلاس نال خطاب

اسلام آباد۔ 3 دسمبر (اے پی پی) وزیر اعظم محمد شہباز شریف مقامی مصنوعات دی پیداواری لاگت کوں گھٹ کرݨ کیتے موثر قدم چاوݨ دی لوڑھ تے زور ݙیندیں ہوئیں آکھیا جو حکومت ولّوں منظور کیتی ڳئی قومی ٹیرف پالیسی ہک انقلابی قدم اَے۔ اے ڳالھیں انہاں بُدھ کوں آپݨی صدارت اچ کسٹمز ڈیوٹی اَتے تجارتی شعبے اچ بئی اصلاحات تے قائم کیتے ڳئے ذیلی ورکنگ گروپ دی سفارشاں تے جائزہ اجلاس نال خطاب کریندیں ہوئیں کیتے ۔ وزیر اعظم آفس دے میڈیا ونگ ولّوں جاری بیان موجب وزیر اعظم آکھیا جو ملکی صنعتی پیداوار اَتے وپار اچ ودھارے کیتے شعبہ جاتی مخصوص مشوریاں اَتے مسئلیاں دی نشاندہی ضروری اَے۔ انہاں آکھیا جو کئی ݙہاکیاں توں معاشی اَتے صنعتی پیداواری صلاحیتاں کوں ودھاوݨ کیتے ایکسپورٹ ڈویلپمنٹ فنڈ کوں ریسرچ اَتے ٹریننگ تے استعمال نئی کیتا ڳیا، ملکی برآمدات اَتے درآمدات دے شعبے اچ ماہرین ولّوں سفارشاں اَتے اصلاحاتی مشوریاں حقیقت تے مبنی اعداد تے شمار دے مطابق ہووݨی چاہیدن ۔ انہاں آکھیا جو مقامی صنعت تے تجارت اَتے مقامی آبادی کیتے صنعتی مصنوعات دی پیداواری لاگت کوں گھٹ کرݨ کیتے موثر قدم چاوݨ حکومت دی ترجیحات اچ شامل ہِن ، حکومت ولّوں منظور کیتی ڳئی قومی ٹیرف پالیسی ہک انقلابی قدم اَے جیڑھا جو ملکی صنعتی پیداوار کوں ودھاوݨ دے نال مقامی اَتے عالمی منڈیاں اچ کاروبار کوں مقابلا کرݨ آلا بݨیندی اَے۔ وزیر اعظم ہدایت کیتی جو بئے ملکاں نال ݙو پاسہ اَتے راہداری (ٹرانزٹ) تجارتی مصنوعات دی بارڈر تے کسٹمز ڈیوٹی دی وصولی دی تکڑی نگرانی ہووݨی چاہیدی اَے۔ وزیر اعظم کوں ورکنگ گروپ دی بریفنگ وچ ݙسیا ڳیا جو برآمدات تے مبنی دیرپا معاشی ترقی مُلک اچ سرمایہ کاری اَتے پیداواری صلاحیّت اچ ودھارے، حکومتی تحفظ اَتے انفراسٹرکچر دی بہتری نال ممکن تھی سڳدی اَے، مُلک دے نمائندہ کاروباری لوکاں تے مبنی ذیلی ورکنگ گروپ ولّوں محمد علی ٹبہ اَتے بئے لوکاں وزیر اعظم کوں کسٹمز اَتے ٹیکس وصولی دے مسئلیاں بارے ݙسیا اَتے آپݨی سفارشاں پیش کیتی۔ وزیر اعظم اِنہاں سفارشاں دا خیرمقدم کیتا اَتے ملکی صنعتی پیداوار کوں ودھاوݨ، کاروباری اَتے سرمایہ کار لوکاں کوں ہر ممکن سہولت ݙیوݨ کیتے متعلقہ وزارتاں اَتے اداریاں کوں خاص ہدایت ݙتن۔ وزیراعظم آکھیا جو اڄوکی قومی ٹیرف پالیسی ملکی صنعتی پیداوار کوں مثبت انداز اچ سہولت ݙیوݨ کیتے نافذ کیتی ڳئی اَے تاںجو برآمدات اَتے درآمدات کوں ملکی مجموعی معاشی ترقی نال ہم آہنگ کیتا ونج سگے۔ اجلاس اچ وفاقی وزیر خزانہ محمد اورنگزیب، وفاقی وزیر اطلاعات تے نشریات عطاء اللہ تارڑ، وفاقی وزیر موسمیاتی تبدیلی ڈاکٹر مصدق ملک، وفاقی وزیر پاور سردار اویس احمد لغاری، وفاقی وزیر اکنامک افئیرز ڈویژن احد خان چیمہ، وفاقی وزیر پٹرولیم علی پرویز ملک، وزیر مملکت خزانہ اظہر بلال کیانی، وزیر اعظم دے معاون خصوصی ہارون اختر، نیشنل کوآرڈینیٹر ایس آئی ایف سی، ملکی صنعتی اَتے کاروباری اداریاں دے نمائندے اَتے بئے متعلقہ سرکاری عہدیداراں شرکت کیتی۔