پی آئی اے دی نجکاری وچ شفافیت اَتے میرٹ اولین ترجیح اے ، بڈنگ دا عمل مُلک بھر وچ ٹی وی تے براہ راست نشر کیتا ویسی ، وزیراعظم محمد شہباز شریف دی پی آئی اے دی نجکاری وچ حصہ گھنݨ آلے سارے بڈرز، کاروباری شخصیات اَتے کمپنیاں دے نمائندیں نال ڳالھ مہاڑ

اسلام آباد۔ 3 دسمبر(اے پی پی)وزیراعظم محمد شہباز شریف آکھیے پاکستان انٹرنیشنل ایئر لائنز دی نجکاری وچ شفافیت اَتے میرٹ اولین ترجیح اے ، نجکاری کیتے بڈنگ دا عمل مُلک بھر وچ ٹی وی تے براہ راست نشر کیتا ویسی ۔ اے ڳالھ انہاں پی آئی اے دی نجکاری وچ حصہ گھنݨ آلے سارے بڈرز، کاروباری شخصیات اَتے کمپنیاں دے نمائندیں نال ڳالھ مہاڑ کریندے آکھی جنہاں اتھاں وزیراعظم ہاؤس وچ انہاں نال ملاقات کیتی اَے۔ وزیراعظم دفتر دے میڈیا ونگ توں جاری بیان موجب وزیر اعظم آکھیے پی آئی اے دا ونڄا تشخص بحال کرݨ اَتے قومی ایئر لائن کوں اڄوکے تقاضیں نال ہم آہنگ کرݨ کیتے نجکاری دا عمل جاری اَے۔ انہاں ایں توقع دا اظہار کیتے انشاء اللہ جلدی پی آئی اے ہک واری ول ’’گریٹ پیپل ٹو فلائی ود‘‘ دیاں آپݨیاں رِیتاں تے پورا لہݨ لَڳ ویسی انہاں آکھیے پی آئی اے دی نجکاری دے عمل وچ شفافیت اَتے میرٹ کوں پکا بݨایا ویندا پئے، بڈنگ دا عمل مُلک بھر وچ ٹی وی تے براہ راست نشر کیتا ویسی ۔ وزیر اعظم آکھیے پی آئی اے دیاں دنیا بھر وچ پروازاں دی بحالی نال پردیس وچ رہݨ آلے پاکستانیاں کیتے سہولت ہوسی ۔ انہاں آکھیے پاکستان دے سیاحتی شعبے دی ترقی کیتے وی قومی ایئر لائن کوں اڄوکے تقاضیں نال ہم آہنگ کرݨ ٻہوں ضروری اَے۔ وزیراعظم ایں امید دا اظہار کیتے جو وی بڈنگ توں بعد ایں اہم ذمے واری کوں سنبھلیسی او قومی ایئر لائن دے تشخص دی بحالی اَتے ایں دی ترقی تے آپݨیاں پُوریاں توانائیاں لیسی ۔ وزیر اعظم ݙسیا جو پی آئی اے دی بڈنگ 23 دسمبر 2025ء کوں ہوسی جیں کوں سارے میڈیا تے براہ راست نشر کیتا ویسی ۔اجلاس وچ نائب وزیراعظم و وزیر خارجہ محمد اسحاق ڈار سودھے وفاقی وزراء احد خان چیمہ، محمد اورنگزیب، عطاء اللہ تارڑ، اعظم نذیر تارڑ، سردار اویس خان لغاری، وزیر مملکت بلال اظہر کیانی، مشیر وزیراعظم محمد علی، معاون خصوصی ہارون اختر اَتے متعلقہ اعلیٰ حکام شرکت کیتی ۔ ملاقات وچ پی آئی اے دی نجکاری کیتے بڈنگ وچ شرکت کرݨ آلے سارے بڈرز شرکت کیتی ۔ شرکاء حکومت ولوں پی آئی اے دی نجکاری دے عمل وچ پیشہ ورانہ اَتے شفاف طریقہ کار دی تعریف کیتی۔