اپوزیشن اتحاد ہک واری ول حقائق کوں بھن تروڑ تے پیش کیتے، ستویں این ایف سی ایوارڈ توں بعد صوبیں دے حصے وچ وݙا ودھارا تھئے، طلال چوہدری

اسلام آباد۔ 3 دسمبر (اے پی پی) وزیر مملکت داخلہ طلال چوہدری آکھیے اڄ اپوزیشن اتحاد ہک واری ول حقائق کوں بھن تروڑ تے پیش کیتے ، ستویں این ایف سی ایوارڈ توں بعد صوبیں دے حصے وچ وݙا ودھارا تھئے اَتے وفاقی محاصل وچ صوبیں دا شیئر تاریخ دی اُچی سطح تے ہے ، خیبر پختونخوا دے رَلائے ڳئے ضلعیں دیاں مالی ضرورتاں وفاق پوری کریندا پئے، اپوزیشن ݙسے جو خیبر پختونخوا حکومت اڄ تئیں اُتھاں کیڑھے ترقیاتی کم کیتن؟ اپوزیشن اتحاد دی پریس کانفرنس تے ردعمل وچ وزیر مملکت طلال چوہدری آکھیے فاٹا دے رلݨ توں بعد صوبے کوں خاص گرانٹس، ترقیاتی پراجیکٹس اَتے سکیورٹی خرچے کیتے وفاق باقاعدگی نال رقماں جاری کریندا رہیے، این ایف سی شیئر تے بے بُنیاد الزام لاوݨ دی بجائے تساں عوام کوں ݙسو جو خیبر پختونخوا حکومت آپݨے ترقیاتی بجٹ دا وݙا حصہ استعمال نی کیتا ۔ انہاں آکھیے اپوزیشن خیبر پختونخوا وچ آپݨے مالی نظم و نسق کوں بہتر بݨاوݨ دی بجائے ذمے واری مرکز تے سٹݨ دی رِیت اپنائی ہوئی اے ، صوبے وچ امن و امان دی بہتری کیتے وفاقی حکومت بھاری مالی اَتے انتظامی تعاون کیتا جیں نال کاروباری سرگرمیاں اَتے سماجی استحکام وچ وݙی بہتری آئی اَے۔ طلال چوہدری آکھیے وفاقی حکومت قومی یکجہتی دیاں لوڑھاں موجب ہر صوبے دے حقوق دی راکھی کریندی اے ، سیاسی فیدے کیتے غلط ڳالھیں کرݨ دا سلسلہ بند تھیوݨا چاہیدے، عوام کوں حقائق توں آگاہ کرݨ ضروری اَے تاں جو اپوزیشن ولوں پیدا کیتی ڳئی غلط فہمیاں دور تھی سڳن ۔ انہاں آکھیے سابق سپیکر اسد قیصر ولوں مایوسی کھنڈاوݨ غیر ذمے وارانہ رویہ اَے، پی ٹی آئی دے حکومت دے دور وچ دوست مُلکاں کوں ناراض کیتا ڳیا ، سرمایہ کاراں کوں غیر یقینی صورتحال وچ سٹیا ڳیا جݙاں جو موجودہ حکومت دیاں معاشی اَتے سفارتی پالیسیاں کوں دنیا بھر وچ تعریف تھئی اے ، دوست مُلکاں دا اساݙے تے اعتماد بحال تھئے، سرمایہ کاری وچ خاص ودھارا ریکارڈ کیتا ڳئے، اعلیٰ سطح دے تجارتی و اقتصادی وفداں دی پاکستان آمدورفت دا سلسلہ جاری اے۔ طلال چوہدری آکھیے مختلف شعبیں وچ شراکت داری دے نویں دروازے کھُلݨ ویندے پئن ، اڄ خطے وچ پاکستان دا مثبت اَتے باوقار تشخص اُبھر تے سامݨے آئے۔ انہاں آکھیے پی ٹی آئی آپݨے دور وچ وپار دے ناں تے سیاست کیتی ، قومی اقتصادی مفاداں دی قیمت تے ذاتی بیانیہ اگوں ودھایا ، ٻاہرلے سرمایہ کاراں دا اعتماد مجروح کیتا ، اے لوک نہ وپار سمجھدن اَتے نہ ہی معیشت توں واقف ہِن جنہاں مُلک کوں معاشی نقصان پُڄائے ۔ طلال چوہدری آکھے موجودہ حکومت عملی اقدامات دے ذریعے ملکی معیشت کوں پکا کریندی پئی اے ، خیبر پختونخوا وچ ترقی، سرمایہ کاری اَتے روزگار کیتے وفاق آپݨا پُورا کردار ادا کریندا پئے اَتے آندے ویلھے وی قومی ترقی دے ہر مرحلے وچ صوبیں نال تعاون جاری رکھیسی۔