سڈنی بیچ واقعے تے بغیر شواہد دے پاکستان مخالف پروپیگنڈا کیتا ڳیا، پاکستان ہک ذمہ دار ملک اے، غیر مصدقہ خبر چلاوݨ تے پاکستان دی ساکھ کوں نقصان پہنچاوݨ دا ذمہ دار کون ہوسی؟ عطاء اللہ تارڑ

اسلام آباد۔ 17 دسمبر(اے پی پی) وفاقی وزیر اطلاعات و نشریات عطاء اللہ تارڑ سڈنی واقعے تے پاکستان کوں ݙوھ ݙیوݨ دی مہم کوں بدنیتی اتے چٹا کوڑ قرار ݙیندے آکھیے جو سڈنی بیچ واقعے تے بغیر شواہد اتے تصدیق دے پاکستان مخالف پروپیگنڈا کیتا ڳئے، بونڈائی واقعے تے مستند چینلز ادارتی قوانین دا وی خیال نئیں رکھیا، کڄھ میڈیا اداریاں دہشت گرداں دا تعلق بے بنیاد طور تے پاکستان نال جوڑیے، پاکستان ہک ذمہ دار ملک اے، اساں ہمیشہ دہشت گردی دی مذمت کیتی اے، بھارتی میڈیا پاکستان کوں بدنام کرݨ کیتے اوچھے ہتھکنڈے استعمال کریندا پئے، واضح تھی چکیے جو بھارت پاکستان اچ دہشت گرداں دی پشت پناہی کریندا پئے، غیر مصدقہ خبر چلاوݨ تے پاکستان دی ساکھ کوں نقصان پچاوݨ دا ذمہ دار کون ہوسی؟ ݙسایا ونڄے کہ پاکستان تے الزام تراشی دا مداوا کیویں کیتا ویسی؟ جھوٹی خبر پھیلاوݨ والیاں کوں باضابطہ معافی منگݨی چاہیدی اے۔ بدھ کوں اتھاں بین الاقوامی میڈیا نمائندیاں کوں بریفنگ ݙیندے وفاقی وزیر اطلاعات آکھیا جو سڈنی دے بونڈائی بیچ تے پیش آوݨ والے افسوسناک واقعے دے حوالے نال تقریباً 48 گھنٹیاں تئیں مس انفارمیشن مہم چلائی ڳئی اے، دنیا دے معتبر اتے قابل اعتماد میڈیا ادارے وی ایں مہم دا حصہ بݨین۔ انہاں واضح کیتا جو ایں معاملے کوں اڳونہا کرݨ دا مقصد کہیں کوں بدنام کرݨ یا کہیں دی دل آزاری کرݨ کائنی بھل اے ہے جو مسئلہ اڳو تے چاتا ونڄے، اینڄھے واقعات دے بعد کہیں ثبوت یا معتبر ذرائع دے بغیر کہیں ملک کوں غیر منصفانہ طور تے ذمہ دار قرار نئیں ݙیوݨا چاہیدا جیڑھا تصدیق اتے تحقیق دے بنیادی صحافتی اصولاں دے منافی اے، سڈنی واقعہ افسوسناک اے جیںدی جتنی مذمت کیتی ونڄے گھٹ اے۔ صدر مملکت، وزیراعظم تے حکومتِ پاکستان سڈنی واقعے دی ݙوٹوک مذمت کیتی اے۔ وفاقی وزیر آکھیا جو پاکستان آپ سالاں توں دہشت گردی دا شکار رہے اتے اساں چنڳاں ڄاݨدے ہیں جو اینڄھے سانحیاں دا ݙکھ کیا ہوندے، پاکستان آسٹریلیا اتے اوندے عوام دا درد سمڄھدے اتے انہاں دے ݙکھ اچ نال اے، اساں آسٹریلیا دی حکومت اتے عوام نال یکجہتی کریندے ہیں۔ انہاں آکھیا جو آسٹریلوی شہری جرات ݙکھیندے حملہ آور کوں قابو کیتا جیں پاروں کئی قیمتی جاناں بچ ڳیاں۔ انہاں آکھیا جو واقعے دے فوراً بعد کڄھ میڈیا ذرائع جلدی ݙکھیندے دعویٰ کیتا جو حملہ آوراں اچوں ہک دا تعلق پاکستان نال ہا جݙاں جو ݙوجھا آسٹریلیا اچ ڄمیا ہا، ٻھل ایں دعوے دی کوئی دستاویزی تصدیق یا شواہد موجود نہ ہن۔ انہاں آکھیا جو اے منظم مہم پاکستان کوں بدنام کرݨ کیتے دشمن ممالک شروع کیتی جیںدا مقصد حقائق کوں مسخ کرݨ اتے پاکستان دے خلاف بے بنیاد تاثر قائم کرݨ ہا۔ اسرائیل اتے بھارت اچ اے مہم سوشل میڈیا اتے الیکٹرانک میڈیا تے وی جاری رہی جیڑھی جو انتہائی افسوسناک اے کیوں جو پاکستان ہمیشہ دہشت گردی دے خلاف فرنٹ لائن تے رہے اتے اوں ایں جنگ اچ بے پناہ جانی و مالی قربانیاں ݙتین۔ وفاقی وزیر اطلاعات آکھیا جو پاکستان اڄ وی دہشت گرداں دے خلاف مسلسل کارروائی کریندا پئے۔ انہاں آکھیا جو سڈنی واقعہ بالکل اوں ݙینہہ پیش آیا جݙاں اساں 16 دسمبر دے شہداء آرمی پبلک سکول پشاور دے ٻالاں کوں یاد کریندے پئے ہاسے، اوں ݙینہہ دہشت گرداں آرمی پبلک سکول پشاور تے حملہ کیتا ہا جیںدے نال معصوم اتے کمسن ٻالاں سودھا قیمتی جاناں دا نقصان تھیا اتے اے سانحہ اڄ وی پوری قوم دے دلاں تے ڄمیا کھڑے۔ انہاں آکھیا جو پاکستان ہک اینجھا ملک اے جیںدے ٻالاں وی دہشت گردی دے خلاف ایں جنگ اچ قربانیاں ݙتین، افسوس اے جو اینڄھے موقع تے جݙاں اساں اپݨے شہداء کوں یاد کریندے پئے ہاسے، پاکستان دے خلاف ہک کوڑی تے بدنیتی بھری مہم چلائی ڳئی۔ انہاں ٻیا آکھیا جو ایں ڳالھ دے کوئی شواہد یا معتبر ذرائع کائنی جو حملہ آوراں اچوں کہیں دا تعلق پاکستان نال ہا اتے اے مہم گمراہ کن معلومات بھری ہئی ٻھل افسوس اے جو دنیا دے ݙاݙھے معتبر میڈیا ادارے وی ایں گمراہ کن مہم دا شکار تھی ڳئے۔ اینجھے نیوز ادارے جیڑھے عالمی سطح تے کم کریندن، انہاں کولو ایڈیٹوریل بورڈ، معلومات دی تصدیق دا نظام موجود ہوندے جیںدے ذریعے معلومات دی جانچ پڑتال اتے ایڈیٹوریل کنٹرول کیتا ویندے، ایںدے باوجود اے میڈیا ادارے صحافت دے بنیادی اصولاں تے عمل کرݨ اچ ناکام رہے۔ انہاں آکھیا جو بھارتی پولیس کل ہک پریس ریلیز جاری کیتی جیںدے اچ آکھیے جو حملہ آور تلنگانہ حیدر آباد دے ہن اتے ایندی تیکھے ہی تصدیق تھی ڳئی ہئی جو اوندا پاسپورٹ بھارتی سفارت خانے سڈنی توں جاری تھیا ہا اتے اوں ایں بھارتی پاسپورٹ تے فلپائن دا سفر وی کیتا جیںدی فلپائن دے حکام تصدیق کیتی اے۔ وفاقی وزیر آکھیا جو اے مہم ݙاݙھی افسوسناک اے۔ ایں موقع تے انہاں ہک ویڈیو وی میڈیا کوں ݙکھائی جیںدے اچ ݙکھایا ڳیا جو اے مہم کیویں چلائی ڳئی اتے کیڑھے میڈیا ادارے ایںدے اچ شامل ہن، اے ہک منظم مہم ہئی جیڑھی ٻہوں تیزی نال کھنݙی، نہ کوئی ایڈیٹوریل بورڈ، نہ کوئی انتظامیہ اتے نہ ہی کوئی اے رپورٹر پچھ سکیا جو اے معلومات کتھوں آندیاں پیاں ہن، ہک نیوز ادارے بغیر کہیں ثبوت دے دعویٰ کر ݙتا جو ݙوہیں حملہ آور لاہور، پاکستان دے ہین۔ انہاں آکھیا جو اے کیویں ممکن اے جو دہشت گردی دے واقعے دی خبراں اچ دعویٰ کیتا ونڄے جو حملہ آور کہیں مخصوص ملک یا علاقے دے ہین جݙاں جو ایں دعوے دی کوئی وی تصدیق شدہ دلیل یا ثبوت موجود نہ ہووے، اے ڳالھ دہشت گردی دے شکار ہووݨ پاروں ساکوں ݙاݙھا مایوس کریندی اے، پاکستان ہمیشہ تے ہر صورت دہشت گردی دی ہر شکل دی سخت مذمت کریندے اتے کریندا رہسی۔ انہاں آکھیا جو اساں فوری ردعمل کائنی ݙتا کیوں جو ہک ذمہ دار ریاست ہوندے پہلے معلومات دی تصدیق کرݨا ضروری ہئی۔ انہاں آکھیا جو بھارتی حکومت کوں کیویں پتا نا ہا جو اے افراد بھارت دے ہین، انہاں کولو بھارتی پاسپورٹ ہا اتے او بھارتی شہری ہن، ہر ملک کولو قومی ڈیٹا بیس ہوندے، چہرے دی سنڄاݨ نال اے سوکھیں پتا لڳ سڳدے جو کون کیڑھے ملک دا اے، ریٹینا سکین، فنگر پرنٹس، چہرے دی شناخت سودھا جدید ٹیکنالوجی دی موجودگی دے باوجود کہیں وی ڈیٹا بیس توں اے واضح تھی ونڄݨا چاہیدا ہا جو او افراد کیڑھے ملک دے ہن، اے مہم چلائی ڳئی جو ہک حملہ آور دا پیؤ پاکستانی شہری اے، صرف ایں بنیاد تے جو اوندا ناں ہک مخصوص علاقے اچ عام اے، ناں ہووݨ کہیں ملک تے الزام لاوݨ کیتے کافی کائنی۔ انہاں سڈنی واقعے دی تحقیقات اچ آسٹریلوی حکام دے پیشہ ورانہ رویے دی تعریف کریندے آکھیا جو کڄھ میڈیا اداریاں بغیر تصدیق دے پاکستان تے الزامات لاوݨ دی بجائے معلومات دی تصدیق دا انتظار کیتے، ہݨ واضح تھی چکیے جو حملہ آور بھارت نال تعلق رکھیندا ہا، بھارت توں ہجرت کر کے آیا، اوندے کولو بھارتی پاسپورٹ ہا تے اوں ہی پاسپورٹ تے سفر کیتا جݙاں جو بھارتی سفارت خانہ، سڈنی اے پاسپورٹ جاری کیتا ہا۔ وفاقی وزیر پچھیا جو پاکستان کوں انھاں جعلی خبراں اتے غلط معلومات نال پڄݨ آلے زیان دی بھرپائی کون کریسی؟ سڈنی واقعے توں پہلے دی پوزیشن تے واپس کیویں ونڄوں؟ کیا قانونی کارروائی کیتی ونڄݨی چاہیدی اے؟ کیا معافی منگی ونڄݨی چاہیدی اے یا صرف اے پروپیگنڈا تاریخ دا حصہ بݨ ویسی؟ انہاں آکھیا جو دنیا دے ٻئے حصیاں اچ وی دہشت گردی دے واقعات تھئن، کینیڈا اچ ہردیپ سنگھ نجر دا قتل ہک مثال اے، اساں سرحد پار تھیوݨ آلی ٹارگٹڈ ہلاکتاں دے واقعات وی ݙٹھن، سڈنی واقعے توں واضح اے جو بھارت پاکستان اچ دہشت گردی دی حمایت کریندے۔ انہاں آکھیا جو ڈی جی آئی ایس پی آر اتے میں آپ کئی واری شواہد نال واضح کر چکیے ہیں جو بلوچستان اتے خیبر پختونخوا اچ تھیوݨ آلے دہشت گردی واقعات دے پچھو بھارتی فنڈنگ اے سرپرستی دا ہتھ اے جیندے ناقابل تردید ثبوت موجود ہن۔ جݙاں وی افغان سرزمین پاکستان اچ حملیاں کیتے استعمال تھئی اے، اتھاں وی بھارتی روابط سامݨے آئن۔ انہاں آکھیا جوہ افغانستان دی موجودہ حکومت اج کل بھارت نال قریبی روابط ودھیندی پئی اے، ایںدے پچھوں آخر کیا وجوہات ہن؟ کیا انہاں وچال ݙوطرفہ تجارتی تعلق یا باہمی تعاون دے امکانات ہین ڄیکوں او پورا کرݨ چاہندن؟ انہاں آکھیا جو ایندے ٻئے پاسو پاکستان اچ بھارتی سرپرستی اچ تھیوݨ والی دہشت گردی دے ناقابل تردید شواہد موجود ہن۔ بھارت نہ صرف پاکستان اچ دہشت گرداں دی مالی معاونت کریندا رہے ٻھل بلوچستان اتے خیبر پختونخوا اچ دہشت گرد حملیاں دی منصوبہ بندی اچ وی ملوث رہے۔ وفاقی وزیر آکھیا جو پاکستان ہک اینجھا ملک اے جیڑھا آپ دہشت گردی دا شکار اے اتے ایں جنگ اچ اساں ان ڳݨ جاناں دی قربانیاں ݙتین، ساݙے فوجی، جوان، افسران، ٻالاں، سکیورٹی اہلکاراں تے پولیس سودھا ہر طبقے دہشت گردی دے خلاف جنگ اچ قربانیاں ݙتیے۔ اساں ایں جنگ کوں جاری رکھے ہوئے ہیں کیوں جو ساݙا یقین اے جو اساں دہشت گردی کوں منݙھو مکاوݨ اچ کامیاب تھیسوں۔ اتنی قربانیاں دے بعد پاکستان دے خلاف ہک کوڑی مہم چلایا ونڄݨ واقعی وݙا افسوسناک اے، وفاقی وزیر آکھیا جو بھارت آپ دہشتگردی دی پشت پناہی کریندے اتے اساں دہشت گردی دے خلاف جنگ لڑدے پئے ہیں، ایہو فرق بھارت اے پاکستان وچال اے، بھارت اکثرا دہشت گردی واقعات دے پچھوں رہے اتے اساں ول ول ایندے شواہد پیش کریندے رہے ہیں، ہݨ ساݙے کولو معتبر معلومات اتے ناقابل تردید شواہد موجود ہین جیندے اچ بھارتی پولیس دی پریس ریلیز، بھارتی پاسپورٹ اتے فلپائن دے حکام دی تصدیق شامل اے جو حملہ آور بھارتی پاسپورٹ تے فلپائن ڳیا تاں پاکستان تے لائے ڳئے الزامات دی تلافی کیویں کیتی ویسی؟ کتھوں آکھیا ویسی جو معذرت، ایوین نا تھیوݨا چاہیدا ہا۔ وفاقی وزیر آکھیا جو اساں ایں معاملے دے حوالے نال وݙے حساس ہیں کیوں جو اساں دہشت گردی دے خلاف جنگ اچ 90 ہزار توں زائد جاناں قربان کیتن۔ انہاں آکھیا کہ اساں ہر ݙینہہ دہشت گرداں دے خلاف کارروائی جاری رکھے ہوئے ہیں۔ اسلام آباد کچہری واقعے دے حملہ آوراں اتے انھاں دے سہولت کاراں کوں گرفتار کیتا ڳیا۔ انہاں آکھیا کہ پاکستان ہمیشہ امن دے حق اچ کھڑا رہے، پاکستان ہمیشہ امن کوں ٹریسی اتے دہشت گردی دے واقعات دی سخت مذمت کریسی، میڈیا کوں وی چاہیدے جو او معلومات دی تصدیق دے بعد سوشل میڈیا اتے ٹیلی ویژن تے ڄڳ کوں اڳو تے پچاوے۔ وفاقی وزیر آکھیا جو ہردیپ سنگھ نجر دا قتل بھارتی ریاست دے اصل چہرے کوں بے نقاب کریندے۔ وفاقی وزیر اطلاعات انڈین ریاست بہار دے وزیراعلیٰ نتیش کمار ولوں ہک مسلم خاتون دا حجاب لہاوݨ دے واقعے دا حوالہ ݙیندے آکھیا جو ایں واقعے نال بھارت اچ انتہا پسندی ٻھری ذہنیت ݙسدی اے، بھارت کولو ڄق کوں ݙکھاوݨ کیتے مثبت بیانیہ یا کہانی کائنی اتے بھارت ہر قسم دی انتہا پسندی ودھیندا پئے، بھارت دی حکومت انتہا پسندی اے دہشت گردی کوں فروغ ݙیوݨ، اقلیتاں تے انھاں دے حقوق کوں دباوݨ تے یقین رکھیندی اے۔