موسمیاتی تبدیلیاں نال موثر انداز اچ نمٹݨ کیتے ملکی وسائل کوں متحرک کرݨ اتے مالیاتی گنجائش تکڑی کرݨی ہوسی، وزیر خزانہ محمد اورنگزیب دا نیویارک اچ خطاب

نیویارک۔23 ستمبر(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو موسمیاتی تبدیلیاں نال موثر انداز اچ نمٹݨ کیتے بیرونی مالی معاونت دے نال نال ملکی وسائل کوں متحرک کرݨ اتے مالیاتی گنجائش تکڑی کرݨ ُروری اے۔ انہاں اے ڳالھ اقوام متحدہ دی جنرل اسمبلی دے سالانہ اجلاس ویلھے عالمی اقتصادی فورم دے فنانسنگ پلینٹ اینڈ پراسپیریٹی اجلاس اچ الیندے ہوئیں آکھی۔ وزیرِ خزانہ پاکستان کوں درپیش موسمیاتی خطرات اتے آفات نال نمٹݨ دے حکومتی اقدامات تے الایا اتے پاکستان کوں موسمیاتی تبدیلیاں پاروں درپیش شدید خطرات، بالخصوص سیلاب نال بنیادی ڈھانچے اتے آبادیاں کوں پڄݨ والے نقصاناں تے وی الایا۔ وزیرِ خزانہ آفات نال نمٹݨ دے نظام، ویلھے توں پہلے خبردار کرݨ دے نظام اتے لاگت تے مبنی موسمیاتی سرمایہ کاری دے منصوبیاں کوں ودھ موثر ٻݨاوݨ کیتے حکومت دے اقدامات ݙسائے۔ انہاں امداد، موسمیاتی موافقت اتے بحالی و تعمیرِ نو کیتے عالمی بینک، ایشیائی ترقیاتی بینک اتے بین الاقوامی کیپٹل مارکیٹس دے ذریعے مالی وسائل دے حصول دے اقدامات دا وی ذکر کیتا۔ وزیرِ خزانہ آکھیا جو ایں حوالے نال کہیں قسم دی غفلت دی گنجائش نئیں اتے عالمی موسمیاتی فنڈز، بشمول گرین کلائمیٹ فنڈ اتے لاس اینڈ ڈیمیج فنڈ تے زور ݙتا جو او اپݨے طریقہ کار کوں سوکھا ٻݨاون اتے موسمیاتی فنانسنگ تئیں رسائی تیز کرن۔