نائب وزیر اعظم اسحاق ڈار دا غزہ اچ جاری مظالم مکاوݨ، انسانی امداد بلا رکاوٹ ݙیوݨ اتے آزاد و خودمختار فلسطینی ریاست دے قیام کیتے سیاسی عمل فوری ودھاوݨ تے لوڑھ

نیویارک۔23 ستمبر(اے پی پی)نائب وزیر اعظم و وزیر خارجہ سینیٹر محمد اسحاق ڈار غزہ اچ جاری مظالم دے خاتمے، انسانی امداد دی بلا رکاوٹ فراہمی اتے ہک آزاد اتے خودمختار فلسطینی ریاست دے قیام کیتے سیاسی عمل کوں اڳو تے ودھاوݨ تے زور ݙتے۔ اقوام متحدہ دی جنرل اسمبلی دے سالانہ اجلاس دے موقع تے نائب وزیراعظم و وزیر خارجہ فرانس دے صدر ایمانوئل میکرون، کینیڈا دے وزیر اعظم مارک کارنی اتے برطانیہ دے وزیر اعظم اینڈی برنہم ولوں سݙیے ڳئے ݙو ریاستی حل بارے اعلیٰ سطح بین الاقوامی اجلاس ’’اڳو تے ودھݨ دا رستہ: نیویارک اعلامیے اتے جامع 20 نکاتی امن منصوبے دے ہک سال بعد‘‘ اچ شرکت کیتی اتے پاکستان دا موقف ݙسایا۔ اجلاس دے افتتاحی کلمات سعودی عرب دے وزیر خارجہ شہزادہ فیصل بن فرحان آل سعود اتے اقوام متحدہ دے سیکریٹری جنرل انتونیو گوتریس وی ادا کیتے۔ اجلاس اچ فلسطین دے صدر محمود عباس (ویڈیو لنک تے)، سپین دے صدر پیڈرو سانچیز، قطر دے وزیر اعظم و وزیر خارجہ شیخ محمد بن عبدالرحمن آل ثانی، مصر دے وزیراعظم مصطفیٰ مدبولی، اردن دے نائب وزیر اعظم و وزیر خارجہ ایمن الصفدی، ناروے دے وزیراعظم جوناس گہر اسٹورے، آئرلینڈ دے نمائندے تائوسیچ، میہال مارٹن، فن لینڈ دے صدر الیگزینڈر اسٹب، یورپی کونسل دے صدر انتونیو کوستا، بورڈ آف پیس دے غزہ کیتے اعلیٰ نمائندے نکولے ملادینوف، نیدرلینڈز دے وزیراعظم روب جیٹن تے ترکیہ دے وزیر خارجہ حاکان فیدان شرکت کیتی۔ نائب وزیراعظم و وزیر خارجہ غزہ اچ جاری مصائب دے خاتمے، انسانی امداد دی بلا رکاوٹ فراہمی یقینی بݨاوݨ اتے ہک آزاد، خودمختار اتے متصل فلسطینی ریاست کیتے ہک ناقابلِ واپسی سیاسی عمل کوں اڳو تے ودھاوݨ تے زور ݙتے، ڄیندیاں سرحداں 1967ء توں پہلے دیاں حدود دے مطابق ہوون اتے القدس الشریف ایںدا دارالحکومت ہووے۔