حکومت آئی ٹی شعبے اچ افرادی قوت دی تکنیکی تربیت، ٹیکس اچ آسانیاں اتے ٻئے امور اچ بہتری کیتے لڳی ہوئی اے، شہباز شریف

اسلام آباد۔18 دسمبر(اے پی پی) وزیراعظم محمد شہباز شریف کوں معاشی ترقی کیتے آئی ٹی دے شعبے اچ اصلاحات بارے سفارشات پیش کر ڈتیاں گئین جڈاں جو وزیراعظم آکھیے جو حکومت آئی ٹی شعبے اچ افرادی قوت دی تکنیکی تربیت، ٹیکس اچ سوکھ اتے ٻئے امور اچ بہتری کیتے ردھی ہوئی اے۔ انھاں اے ڳالھ معاشی ترقی کیتے آئی ٹی شعبے دے حوالے نال نجی شعبے دے ورکنگ گروپ دے اجلاس دی صدارت کریندے آکھی۔ اجلاس اچ وفاقی وزراء ڈاکٹر احسن اقبال، جام کمال خان، محمد اورنگزیب، ڈاکٹر مصدق مسعود ملک، احد خان چیمہ، عطا اللہ تارڑ، شزا فاطمہ خواجہ، وزیر مملکت برائے خزانہ بلال اظہر کیانی، معاون خصوصی ہارون اختر، چیئرمین ایف بی آر اتے متعلقہ اداریاں دے اعلیٰ افسران شرکت کیتی۔ اجلاس اچ وزیراعظم کوں ڈیجیٹل معیشت کوں وسعت ڈیوݨ، آئی ٹی برآمدات اچ اضافے اتے آئی ٹی شعبے اچ ٻئی اصلاحات سانڳے سفارشات پیش کیتیاں گئن۔ وزیراعظم شہباز شریف، آصف پیر دی سربراہی اچ بݨائی گئی کمیٹی دی سفارشات دا خیر مقدم کریندے آکھیے جو آئی ٹی دی تکنیکی تربیت کیتے سارے اقدامات پاکستانی نینگراں کوں عالمی آئی ٹی مارکیٹ اچ بطور تجربہ کار افرادی قوت متعارف کراوݨ تے ہے، نینگراں کیتے ملازمت دے مواقع پیدا کرݨ کیتے ودھ اقدامات کریندے ہوئے ملک اچ آئی ٹی انفراسٹرکچر بہتر بݨایا ونڄن۔ وزیراعظم، وزیر خزانہ دی سربراہی اچ بݨائی گئی اعلیٰ سطح دی کمیٹی کوں اجلاس اچ پیش کیتی گئی سفارشات دا جائزہ گھن تے ڈو ہفتیاں اچ رپورٹ پیش کرݨ دی ہدایت کیتی۔