جڑواں شہراں اچ ترقیاتی منصوبیاں دی ریکارڈ مدت اچ تکمیل قابلِ ستائش اے، وزیراعظم محمد شہباز شریف دا خطاب

اسلام آباد۔18دسمبر(اے پی پی) وزیر اعظم محمد شہباز شریف جڑواں شہراں اچ ݙو مزید ترقیاتی منصوبیاں دی ریکارڈ مدت اچ تکمیل اتے عوام کوں سفری سہولیات ݙیوݨ دی تعریف کریندے آکھیے جو اے منصوبے نہ صرف راولپنڈی اسلام آباد ٻھل پورے پاکستان توں آوݨ والے عوام کیتے فائدہ مند ہین، عوامی خدمت دا سفر جاری رہسی۔ انھاں اے ڳالھ خمیس کوں اتھاں اقبال فلائی اوور/ ٹی چوک فلائی اوور، اسلام آباد ایکسپریس وے سگنل فری کوریڈور دی افتتاحی تقریب نال خطاب اچ آکھی۔ ایں موقع تے وفاقی وزراء، ارکان اسمبلی، سی ڈی اے و ضلعی انتظامیہ دے حکام، کنٹریکٹرز اتے مقامی عمائدین دی وݙی تعداد وی موجود ہئی۔ وزیر اعظم، وزیر داخلہ، انھاں دی ٹیم اتے کنٹریکٹرز کوں شاندار منصوبے دی تکمیل تے مبارکباد ݙیندے آکھیے جو ایں منصوبے کوں وی ریکارڈ مدت اچ مکمل کیتا گئے۔ انھاں آکھیے جو عام آدمی دی سہولت کیتے اے منصوبے ٻہوں اہمیت رکھدن۔ انھاں آکھیے جو ݙیݙھ سال اچ بہارہ کہو، ایف نائن، سرینا چوک، رسول چوک، مارگلہ چوک، طیب اردوان فلائی اوور اتے انڈر پاسز سودھا کرنل شیر خان کوریڈور، میٹرو بس سروس ڄھیں منصوبے نہ صرف جڑواں شہراں دے رہائشیاں ٻھل پورے پاکستان توں آوݨ آلے عوام کیتے فائدہ مند ہین۔ انھاں تجاوزات دا خاتمہ کر کے منصوبے دی تکھے تکمیل دی راہ ہموار کرݨ والے افسراں کوں وی شاباش ݙتی۔ وزیر اعظم آکھیے جو عوام کوں سفر دی بہترین سہولتاں دی فراہمی خوش آئند اے۔ انھاں شفافیت اتے معیار کوں یقینی بݨیندے ہوئے اڳوں ودھݨ اتے عوامی خدمت دا سفر جاری رکھݨ دا عزم دوہرائے۔ وزیر داخلہ محسن نقوی تقریب نال خطاب کریندے ہوئے آکھیے جو ٹی چوک اچ ٹریفک جام دا مسئلہ معمول ہئی، ایکسپریس وے دے نال سروس روڈ دا منصوبہ وی تکھے شروع کریسوں۔ انھاں آکھیے جو وفاقی دارالحکومت دی ترقی کیتے وژن 2027 تے عمل کریندے پئے ہیں، ݙو سال بعد ہک نواں اسلام آباد ݙیکھݨ کوں ملسی، منصوبیاں اچ شفافیت کوں یقینی بݨیندی پئی اے، شاہین چوک منصوبہ وی چھیکڑی مراحل اچ اے۔ انھاں اسلام آباد دے رہائشیاں کیتے پاݨی دا مسئلہ حل کرݨ دی وی یقین دہانی کرائی۔ ایں توں پہلے وزیر اعظم اقبال فلائی اوور ٹی چوک، اسلام آباد ایکسپریس وے سگنل فری کوریڈور دا افتتاح کیتا۔ انھاں منصوبے دا معائنہ وی کیتا اتے وزیراعظم کوں منصوبے بارے تفصیلی بریفنگ وی ݙتی گئی جیندے اچ ݙسایا گیا جو راولپنڈی، اسلام آباد دے درمیان ٹریفک دے بہاؤ اچ روانی کیتے منصوبے کوں 77 ݙینہہ دی ریکارڈ مدت اچ مکمل کیتا گئے اتے ایںدے تے ہک ارب 40 کروڑ روپے لاگت آئی اے۔