پاکستان بحرین نال تجارت اتے سرمایہ کاری تعلقات کوں ودھ تکڑا کرݨ چاہندے، صدر مملکت آصف علی زرداری دی بحرین دے سفیر محمد ابراہیم محمد عبدالقادر نال ڳالھ مہاڑ

اسلام آباد۔18دسمبر(اے پی پی):صدر مملکت آصف علی زرداری نال ایوان صدر اسلام آباد اچ بحرین دے سفیر محمد ابراہیم محمد عبدالقادر ملاقات کیتی اے۔  صدرِ مملکت بحرین کوں 2026–2027 دی مدت کیتے اقوامِ متحدہ دی سلامتی کونسل دا رکن چݨیڄݨ تے مبارکباد ݙتی اتے پاکستان اچ حالیہ دہشت گردانہ واقعات توں بعد بحرین ولوں یکجہتی اتے حمایت تے شکریہ ادا کیتے۔ صدر آصف علی زرداری یاد ݙیوایا وزیراعظم محمد شہباز شریف بحرینی قیادت بشمول شاہِ بحرین، شاہی ولی عہد اتے نائب ولی عہد کوں پاکستان دے دورے دی دعوت ݙتی اے اتے پاکستان انھاں دی میزبانی کرݨ دا تانڳھی اے۔ انھاں شاہِ بحرین ولوں پاکستان دے دورے دی دعوت قبول کرݨ دی تعریف کیتی۔ صدر آکھیا جو پاکستان بحرین نال تجارتی اتے سرمایہ کاری تعلقات ٻئے ودھاوݨ چاہندے، بحرینی سرمایہ کار فوڈ سکیورٹی، آئی ٹی اتے سیاحت سودھا ٻئے ترجیحی شعبیاں اچ مواقع توں فیدہ چا سڳدن۔ انھاں ہک لکھ توں ودھ پاکستانیاں کوں عزت اتے مواقع ݙیوݨ تے بحرین دی حکومت اتے پاکستانی قیدیاں دی معافی تے شاہِ بحرین دا شکریہ ادا کیتا۔ ملاقات اچ سینیٹ اچ قائد ایوان سینیٹر شیری رحمان اتے سینیٹر سلیم مانڈوی والا وی موجود ہن۔