سپیکر قومی اسمبلی دی مالدیپ دے نائب صدر نال ملاقات

اسلام اباد۔ 19 دسمبر(اے پی پی)سپیکر قومی اسمبلی سردار ایاز صادق دی سربراہی اچ پارلیمانی وفد دورہ مالدیپ دے موقع تے مالدیپ دے نائب صدر عز حسین محمد لطیف نال ملاقات کیتی اے جیندے اچ پاک مالدیپ تعلقات اتے اہم علاقائی و بین الاقوامی معاملیاں تے ڳالھ مہاڑ کیتی ڳئی۔ ملاقات اچ سپیکر ایاز صادق آکھیے جو پاکستان مالدیپ نال دوستی اتے برادرانہ تعلقات کوں ودھ اہمیت ݙیندے، پاک مالدیپ تعلقات سانجھے مذہب، اخوت اتے مضبوط عوامی رابطیاں تے قائم ہن، سرحد پار توں دہشت گردی ھک سنگین علاقائی اتے عالمی چیلنج اے، کراس بارڈر دہشت گردی ختم کرݨ کیتے کٹھیاں کوششاں ضروری ہین، پاکستان کوں بھارتی سرپرستی اچ سرگرم فتنہ الخوارج دی دہشت گردی دا سامݨا اے۔ سپیکر سردار ایاز صادق فلسطینی عوام دے خلاف اسرائیلی مظالم اتے کھاوݨ پیوݨ دی چیزاں و دوائیاں دی بندش دی سخت مذمت کیتی۔ سپیکر قومی اسمبلی بھارت اچ اقلیتاں خاص کر مسلماناں دے خلاف ودھدے امتیازی سلوک اتے عدم برداشت تے چنتا کیتے۔ انہاں آکھیے جو بہار دے وزیرِ اعلیٰ ولوں مسلم تریمت دا حجاب لہاوݨ قابلِ مذمت اتے شرمناک اے۔ سپیکر قومی اسمبلی اتے نائب صدر مالدیپ موسمیاتی تبدیلی کوں سانجھا عالمی چیلنج قرار ݙتے اتے ایں سانڳے رل تے کوششاں کرݨ تے اتفاق کیتے۔ پاکستانی وفد اچ صلاح الدین جونیجو، نوید عامر جیوا، محمود قادر خان، بلال فاروق تارڑ، محمد بلال بدر اتے دانیال احمد شامل ہن۔