وفاقی وزیرِ تجارت ولوں پہلی پوڈکاسٹ سیریز دا افتتاح

اسلام آباد۔20 دسمبر (اے پی پی) وفاقی وزیر تجارت جام کمال خان زرعی شعبے خاص طور تے باغبانی (ہارٹیکلچر) اچ ڈیجیٹل جدت تے علم دی ترویج دو ہک اہم پیشرفت دے طور تے پاکستان ہارٹیکلچر ڈویلپمنٹ اینڈ ایکسپورٹ کمپنی (پی ایچ ڈی ای سی) دی پہلی پوڈکاسٹ سیریز دا افتتاح کر ڈتے۔ وزارت تجارت دے بیان موجب وزارت دے تحت پہلا پوڈکاسٹ اقدام اے جیندے مقصد پاکستان دے شعبہ باغبانی اچ آگاہی ودھاوݨ، بہترین طریقے شیئر کرݨ تے پائیدار ترقی کوں ودھارا ݙیوݨ اے۔ “باغبانی” دے عنوان نال شروع تھیوݨ والا اے پوڈکاسٹ کساناں، برآمد کنندگان، محققین تے پالیسی سازاں سودھے سارے متعلقہ فریقاں کیتے ہک موثر پلیٹ فارم ثابت تھیسی ۔ ایندے اچ پائیدار کاشتکاری، برآمدی حکمتِ عملی، ویلیو ایڈیشن، فصل دے بعد نقصانات اچ کمی تے موسمیاتی تبدیلی دے اثرات جیہے اہم موضوعات تے تفصیلی ڳالھ مہاڑ شامل ہوسی۔ٻیا اے جو معروف زرعی ملکاں دے بین الاقوامی ماہرین کوں وی مہمان دے طور تے سݙیا ویسی تاں جو عالمی تجربے تے جدید حل پیش کیتے ونڄ سڳن جیندے نال مواد ٻیا جامع تے موثر بݨسی ۔ پی ایچ ڈی ای سی باغبانی دی ترقی تے برآمدات دے فروغ اچ صفِ اول دا کردار ادا کریندی پئی اے۔ ادارے دی وݙی کامیابیاں اچ فروٹ ڈی ہائیڈریشن یونٹس دا قیام، ایران کوں کیلا برآمد کرݨ اچ سہولت، ہک ملین توں ودھ آمب تے کیلے دے بیگنگ بیگز دی ونڈ تے ملک بھر اچ 100 توں ودھ تربیتی ورکشاپا شامل ہن ۔ اے پوڈکاسٹ انہاں کوششاں دا تسلسل اے جیندے ذریعے کلائمٹ سمارٹ قسماں، موثر آبپاشی تے عالمی معیار (HACCP) دی پابندی کوں عام کیتا ویسی۔ وزارتِ تجارت ای کامرس دے ودھارے تے یورپی یونین تے مشرقِ وسطیٰ تئیں مارکیٹ رسائی کوں ترجیح ݙیندی پئی اے۔ اے پلیٹ فارم اڳلے ترائے سالاں اچ باغبانی برآمدات کوں 2 ارب ڈالر تئیں پڄاوݨ دے ہدف اچ تیزی گھن آسی ۔ وزیرِ تجارت جام کمال خان آکھیا جو اے پوڈکاسٹ علمی خلا پُر کرݨ تے باغبانی برادری کوں طاقتور بݨاوݨ دا ذریعہ بݨسی۔