کراچی اچ ودھ ساری کوہیڑ پاروں6 بین الاقوامی پروازاں متبادل ہوائی اݙیں تے منتقل

اسلام آباد۔21 دسمبر(اے پی پی)پاکستان ایئرپورٹ اتھارٹی (پی اے اے) ݙسایا جو کراچی اچ ودھ ساری کوہیڑ تے گھٹ حدِ نگاہ پاروں حفاظتی تقاضیں دے تحت چھی (6) بین الاقوامی پروازاں کوں متبادل ہوائی اݙیں تے منتقل کر ݙتا ڳئے۔ پاکستان ائیر پورٹ اتھارٹی موجب گھٹ حدِ نگاہ اچ پروازاں دی منتقلی ہک معمول دا حفاظتی قدم اے جیندا مقصد مسافراں، عملے تے جہازاں دی مکمل حفاظت یقینی بݨاوݨ اے۔تفصیل موجب اتحاد ایئر ویز تے گلف ایئر دی کراچی آوݨ آلی پروازاں متبادل طور تے مسقط منتقل کرݙتیاں ڳئن ۔ ایویں ہی فلائی جناح دی پرواز جدہ توں کراچی دی بجائے اسلام آباد لاتھی ڳئی اے، جݙاں جو پی آئی اے دی پرواز مدینہ توں کراچی دی بجائے مسقط بھیج ݙتی ڳئی اے۔ پی اے اے آکھیے جو موسم ٹھیک تھیندے ہی پروزاں دی آونڄ معمول موجب بحال تھی ویسی ۔ مسافراں توں درخواست کیتی ڳئی اے جو او اپݨی پروازاں بارے تازہ معلومات کیتے متعلقہ ایئر لائن نال رابطے اچ رہن