چیئرمین پی سی پی محسن نقوی دا ایشیا کپ انڈر 19 دے فائنل اچ روایتی حریف بھارت کوں ہراوݨ تے پاکستان ٹیم کوں مبارخ

لاہور۔21 دسمبر (اے پی پی)چیئرمین پاکستان کرکٹ بورڈ محسن نقوی ایشیا کپ انڈر 19 دے فائنل اچ پراݨے حریف بھارت کوں شکست ڈیوݨ تے پاکستان انڈر 19 کرکٹ ٹیم کوں مبارخ ݙتی اے۔ چیئرمین پی سی بی محسن نقوی آکھیا جو پاکستان انڈر 19 ٹیم فائنل اچ ٻہوں چنڳا کھیݙ پیش کرتے بھارت کوں ہرائے ، جیڑھا نینگراں کھݙاریاں دی محنت، بہترین حکمت عملی تے ٹیم ورک دا کھلا ثبوت اے۔ انہاں آکھیا جو کھݙاریاں دی کامیابی رل مل تے کم کرݨ دا نتیجہ اے۔محسن نقوی بھارت دے خلاف میچ اچ سمیر منہاس دی بیٹنگ دی تعریف کریندے آکھیا جو انہاں دی ذمہ دارانہ اننگز جت اچ اہم ترین ہئی ۔ انہاں آکھیا جو بیٹنگ، بولنگ تے فیلڈنگ، ترائی شعبیں اچ کھݙاریاں چنڳا کھیݙ پیش کیتے، جیندے نتیجے اچ اے فتح ممکن تھئی اے۔ چیئرمین پی سی بی دا آکھݨ ہئی جو اے کامیابی کرکٹ شوقیناں کیتے خوشی تے ماݨ دی ڳالھ اے ۔انہاں آکھیا جو پاکستان کرکٹ بورڈ دی طرفوں “رائزنگ سٹارز” تے جیڑھی سرمایہ کاری کیتی ڳئی ہئی، اوندا نتیجہ اڄ ہک شاندار فتح دی شکل اچ سامݨے آئے ، جیڑھا قابلِ تحسین اے۔محسن نقوی ٹیم مینجمنٹ، اعلیٰ افسران تے کوچنگ سٹاف دی کوششاں دی وی تعریف کیتی تے آکھیا جو نینگراں دی محنت پاکستان کرکٹ دے روشن مستقبل دا پتہ ݙیندی اے۔ انہاں آکھیا جو کھیݙ دے میدان اچ جیڑھی وی اوکھ پیش آوے، پاکستان کرکٹ بورڈ انھاں چیلنجز نال نبݨݨ کیتے ہر ویلھے تیار اے۔