ہر نینگر کیتے لیپ ٹاپ حکومت دا ہک اہم مشن اے، وجیہہ قمر

اسلام آباد۔22 دسمبر (اے پی پی)وفاقی تعلیم تے پیشہ ورانہ تربیت دی وزیرِ مملکت وجیہہ قمر آکھیے جو ہر نینگر کیتے لیپ ٹاپ حکومت دا ہک اہم مشن اے جیندے تحت وزیراعظم لیپ ٹاپ سکیم کوں ٻیا ودھایا ویندا پئے ۔ اے ڳالھ انہاں علامہ اقبال اوپن یونیورسٹی اچ لیپ ٹاپ ونڈݨ دی تقریب اچ بطور خاص مہمان خطاب کریندے آکھی۔ انہاں آکھیا جو تعلیم دا ودھارا تے نینگراں کوں بااختیار بݨاوݨ حکومت دی پہلی ترجیح اے۔وجیہہ قمر آکھیا جو پاکستان ہݨ ٹھیک رستے تے چل پئے تے معاشی استحکام آلے پاسے ودھدا پئے جیندے اچ نینگراں دا کردار ٻہوں اہم اے ۔ انہاں طلبا کوں آکھیا جو ساݙی افواج سرحداں دی محافظ اے تے تساں نظریاتی سرحداں دے محافظ ہیوے ۔اساں ساریں توں پہلے پاکستانی ہیسے، ایں کیتے ایں لیپ ٹاپ کوں تعلیم تے تربیت دے مقاصد کیتے ٹھیک طریقے نال استعمال کرو تاں جو تساں پاکستان دی ترقی اچ اپݨا موثر حصہ پا سکو۔یونیورسٹی دے وائس چانسلر پروفیسر ڈاکٹر ناصر محمود ݙسایا جو ہائر ایجوکیشن کمیشن (ایچ ای سی) دی کوششاں نال حکومتِ پاکستان ولوں یونیورسٹی دے 2475 طلبا کیتے لیپ ٹاپ مل ڳئن ۔ تقریب اچ اعلیٰ افسران، رجسٹرار راجہ عمر یونس تے ایچ ای سی دے نمائندے وی موجود ہن ۔ انہاں آکھیا جو نینگراں کوں تعلیم اچ پیش آوݨ آلی ہر اوکھ نال نبݨݨ کیتے جدید ٹیکنالوجی ٻہوں مددگار ثابت تھیسی۔