انٹرنیٹ دی سپیڈ تے رسائی ودھیسوں، ملک اچ وقتی فائیوجی ٹیکنالوجی متعارف کرائی ویسی، وفاقی وزیرِ آئی ٹی شزہ فاطمہ خواجہ

اسلام آباد۔23 دسمبر (اے پی پی)وفاقی وزیرِ انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیا جو اقتصادی رابطہ کمیٹی (ای سی سی) سپیکٹرم آکشن کمیٹی دی سفارشات کوں منظور کرڳھدے ، ڈیجیٹل پاکستان پروگرام کوں اڳوں ودھیندے پیوں، انٹرنیٹ دی سپیڈ دے نال ایندی رسائی وی ودھیسوں، ٹیلی کام سیکٹر سودھے ٻئے متعلقہ فریقاں نال مشورہ یقینی بݨایا ویسی، کوشش اے جو فروری 2026ء دے پہلے ہفتے تئیں 600 میگا ہرٹز سپیکٹرم دی آکشن مکمل کرگھنوں، پاکستان اچ وقتی فائیو جی ٹیکنالوجی متعارف کرائی ویسی۔ اے ڳالھ انہاں وفاقی وزیرِ خزانہ محمد اورنگزیب دے رلے ای سی سی اجلاس دے بعد میڈیا کوں بریفنگ ݙیندے آکھی۔ وفاقی وزیرِ آئی ٹی شزا فاطمہ خواجہ آکھیا جو اینکوں ہݨ وفاقی کابینہ اچ گھن ویسوں ، ساݙی کوشش اے  جو جنوری دے چھیکڑ یا فروری دے پہلے ہفتے اچ سپیکٹرم آکشن کوں مکمل کرگھنسوں، پاکستان اچ انٹرنیٹ سروسز عالمی معیار موجب کائنی ،ایندی بنیادی وجہ سپیکٹرم دی موجودگی نہ ہووݨ اے ، ایں ویلھے پاکستان دی 24 کروڑ آبادی 274 میگاہرٹز دے سپیکٹرم تے آپریٹ کریندی پئی اے ، اینکوں بہتر بݨاوݨ کیتے سپیکٹرم آکشن کیتا ویندا پئے، ساݙی کوشش اے  جو 600 میگاہرٹز سپیکٹرم آکشن کیتا ونڄے، اے ماضی دی ساریں توں وݙی سپیکٹرم آکشن اے ، ایندے نال تھری جی تے فور جی سروسز بہتر تھی ویسن تے فائیو جی سروس وی متعارف تھی ویسی۔ انھاں آکھیا جو پی ٹی اے یقینی بݨیسی جو آوݨ آلے چار توں چھی مہینے اچ فائیو جی دے سارے عمل کوں مکمل کیتا ونڄے، آوݨ آلے چار توں چھ ماہ اچ سروسز دے معیار اچ بہتری نظر آسی، فائیو جی وقتی پاکستان اچ متعارف تھی ویسی۔ انھاں آکھیا جو سارے ڈیجیٹلائزیشن دی بنیاد انٹرنیٹ اے ، آوݨ آلے پنج سال تئیں 100 ایم بی پی ایس کنکٹیویٹی تھی ویسی۔ انھاں آکھیا جو ایں ویلھے پاکستان اچ پنج فیصد فائبرائزیشن اے ، اینکوں ودھایا ویسی تاں جو انٹرنیٹ دی سپیڈ بہتر تھی سڳے۔