وزیراعظم شہباز شریف دی صدارت اچ وفاقی کابینہ دا اجلاس، ویزا کلیئرنس نظام، پی پی آر اے آرڈیننس 2002 اچ ترامیم تے نیشنل یونیورسٹی ٻل دی تنسیخ دی منظوری

اسلام آباد۔23 دسمبر (اے پی پی) وفاقی کابینہ وزارتِ داخلہ دی سفارش تے ویزا کلیئرنس نظام دی منظوری ݙے ݙتی جیندا مقصد ٻاہرلے ملک ونڄݨ آلے پاکستانیاں کیتے شفاف تے محفوظ نظام دے تحت ویزے دے حصول کوں سوکھا بݨاوݨ اے۔ وفاقی کابینہ نیشنل یونیورسٹی فار سکیورٹی سائنسز اسلام آباد 2025 دے ٻل دی تنسیخ تے پبلک پروکیورمنٹ ریگولیٹری اتھارٹی آرڈیننس 2002 (پی پی آر اے آرڈیننس 2002) اچ ترامیم دی اصولی منظوری وی ݙے ݙتی اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت وفاقی کابینہ دا اجلاس وزیراعظم ہاؤس اچ منعقد تھیا۔اجلاس توں خطاب کریندے وزیراعظم آکھیا جو حکومتِ پاکستان ملکی ترقی و خوشحالی تے سیاسی ہم آہنگی کیتے ساریاں سیاسی جماعتاں نال پرامن ڈائیلاگ دے اپݨے اصولی موقف تے قائم اے۔ انھاں دا آکھݨ ہئی جو ذاتی طور تے ساریاں سیاسی جماعتاں کوں کئی واری ڈائیلاگ دی پیشکش کیتی ڳئی اے، سیاسی ڈائیلاگ دی آڑ اچ امن و امان دی صورتحال کوں خراب کرݨ دی کہیں وی مذموم کوشش کوں کامیاب کائناں تھیوݨ ݙتا ویسی۔ انھاں ٻیا آکھیا جو پی آئی اے دی شفاف، مستند تے قابلِ اعتبار نجکاری دے عمل کوں یقینی بݨاوݨ کیتے حکومت ہر ممکن اقدامات کریندی پئی اے۔ انھاں پوری قوم کوں انڈر 19 ایشیا کپ جِتݨ تے مبارخ وی ݙتی۔وفاقی کابینہ پٹرولیم ڈویژن دی سفارش تے آف گرڈ پاور پلانٹس لیوی ایکٹ 2025 دی توسیع تریجھے فریق ولوں کیپٹیو پاور پلانٹس کوں گیس ویچݨ دی منظوری ݙے ݙتی ۔ وفاقی کابینہ پبلک ٹینڈرنگ تے پروکیورمنٹ دے سارے مرحلیں کوں جدید تقاضیں نال ہم آہنگ کرݨ کیتے پی پی آر اے آرڈیننس 2002 اچ ترامیم دی اصولی منظوری وی ݙتی اے۔ ایں توں انڄ وفاقی کابینہ نیشنل یونیورسٹی فار سکیورٹی سائنسز اسلام آباد 2025 دے ٻل دی تنسیخ دی منظوری ݙیندے قومی اسمبلی اچ پرائیویٹ ممبرز ٻلز تے ٻئی قانون سازی کیتے موثر انداز اچ مشورے کیتے کمیٹی بݨا ݙتی اے۔ وفاقی کابینہ نیشنل کینبیز کنٹرول اینڈ ریگولیٹری پالیسی 2025 دی منظوری وی ݙتی جیندا مقصد ملک اچ فارماسیوٹیکل تے ٹیکسٹائل سیکٹر اچ نباتاتی ٻوٹیاں دے استعمال کوں ودھاوݨ اے۔ وفاقی کابینہ کابینہ کمیٹی لیجسلیٹیو کیسز دے 20 اکتوبر 2025ء، 5 نومبر 2025ء تے 21 نومبر 2025ء دے اجلاس اچ ڳھدے ڳئے فصیلیں دی توثیق کیتی۔ وفاقی کابینہ اقتصادی رابطہ کمیٹی دے 18 دسمبر 2025ء دے اجلاس اچ ڳھدے ڳئے فصیلیں دی وی توثیق کر ݙتی ۔ جیڑھا وی نواں قانون شروع تھیسی، اوندے نال انتظامی اوکھ نال نبݨݨ اچ مدد ملسی۔