پاکستان تے چین دے تعلقات ویلھے دی کسوٹی تے کھرے ثابت تھئن، سی پیک ملک اچ ترقی دے نویں دور دی بنیاد رکھی اے، عطا اللہ تارڑ

اسلام آباد۔24 دسمبر(اے پی پی) وفاقی وزیرِ اطلاعات و نشریات عطا اللہ تارڑ آکھیے جو پاکستان تے چین دے تعلقات ویلھے دی کسوٹی تے کھرے ثابت تھئن، سی پیک ملک اچ انفراسٹرکچر، صنعت تے ثقافتی ترقی دے نویں دور دی بنیاد رکھی اے جیندے نتیجے اچ ݙوہیں ملکاں دے عوام وچال فاصلے گھٹ تھئن۔ سی پیک میڈیا فورم نال خطاب کریندے وفاقی وزیر آکھیا جو پاکستان کوں چین دے نال خصوصی تعلقات دا اعزاز حاصل اے تے “آئرن برادرز” دی اصطلاح صرف انھاں ݙوہیں ملکاں کیتے استعمال تھیندی اے۔ انھاں آکھیا جو سی پیک نہ صرف سڑکاں تے پُل بݨائے بلکہ ثقافتی ہم آہنگی وی پیدا کیتی اے۔عطا اللہ تارڑ آکھیا جو سی پیک دے پہلے مرحلے دا شروع ملکی تاریخ دا اہم سنگ میل ہئی جینکوں معیشت دی بحالی کیتے ہمیشہ یاد رکھیا ویسی۔ ڈیجیٹل دور تے ڳالھ کریندے وفاقی وزیر آکھیا جو وزارتِ اطلاعات اچ پاکستان دا پہلا ڈیجیٹل کمیونیکیشن ڈیپارٹمنٹ قائم کیتا ڳئے کیوں جو ریاست دے ابلاغ کیتے ڈیجیٹل موجودگی لازمی تھی چکی اے۔ انھاں آکھیا جو بھارت ولوں کھنڈائی ونڄݨ آلی غلط معلومات دا مقابلہ کرݨ کیتے پاکستانی میڈیا ذمہ دارانہ صحافت دا مظاہرہ کیتے۔ سی پیک 2.0 دے حوالے نال وفاقی وزیر آکھیا جو اے پہلے مرحلے دی کامیابی دا تسلسل اے جیندے اچ نجی شعبے تے صنعتکاراں کوں بااختیار بݨایا ویندا پئے۔ انھاں تجویز ݙتی جو ہک ڈیجیٹل فیکٹ چیک فورم بݨایا ونڄے جیڑھا کوڑیاں خبراں دی نشاندہی کرے۔ آوݨ آلے سال پاکستان تے چین دے سفارتی تعلقات دے 75 سال مکمل تھیوݨ آلے ہن جیڑھا ہک وݙا سنگ میل تھیسی