پی آئی اے دی نجکاری نال کارکردگیاچ بہتری تے سرمایہ کاری اچ ودھارا تھیسی ،مشیر نجکاری محمد علی دی پریس کانفرنس

اسلام آباد۔ 24 دسمبر(اے پی پی) وزیراعظم دے مشیر نجکاری محمد علی آکھیے جو پی آئی اے دی نجکاری نال کارکردگی اچ بہتری آسی، نجکاری نال سرمایہ کاری اچ ودھارا تھیسی۔ پی آئی اے دا ساریں توں وݙا اثاثہ ایندے روٹس ہن۔ انھاں آکھیا جو پی آئی اے سالانہ 40 لکھ مسافراں کوں سہولتاں ݙیندی اے، نجکاری نال پی آئی اے دی عظمتِ رفتہ بحال تھیسی تے جی ڈی پی اچ وی ودھارا تھیسی۔ اے ڳالھ انہاں پریس کانفرنس اچ آکھی ۔ ایں موقع تے وفاقی وزیر اطلاعات عطا اللہ تارڑ تے ٻئے اعلیٰ افسران وی موجود ہن۔مشیر نجکاری گزریل ݙٰینھ پی آئی اے دی نجکاری دا عمل مکمل تھیوݨ تے قوم کوں مبارخ ݙیندے آکھیے جو ایں عمل اچ وزیراعظم، نائب وزیراعظم تے آرمی چیف فیلڈ مارشل سید عاصم منیر رہنمائی کیتی اے۔ انھاں آکھیا جو عارف حبیب کنسورشیم ساریں توں زیادہ ٻولی ݙتی اے جیڑھے مبارخ دے مستحق ہن ۔ بریفنگ دے دوران ݙسایا ڳیا جو پی آئی اے کنے کل 33 جہاز ہن جنھاں اچوں 19 آپریشنل ہن۔ انھاں آکھیا جو 2015 دے بعد پی آئی اے کوں ہر سال ارباں روپے دے خسارے دا سامݨا ہئی کیونکہ ڈیجیٹلائزیشن نہ تھیوݨ پاروں مالی خسارہ ودھدا ڳئے۔ 23 دسمبر 2025 کوں نجکاری دا عمل مکمل کیتا ڳئے تے ادارے دے 182 ارب روپے دے واجبات نویں خریدار کوں منتقل کیتے ڳئن۔ انھاں واضح کیتا جو نجکاری دے بعد حکومت تے مالی ٻوجھ گھٹ تھیسی۔ ہک سوال دے جواب اچ انھاں آکھیا جو وفاقی حکومت آوݨ آلے 15 سال ایئرلائن دا بزنس کائناں کریسی، پر جے کوئی صوبہ چاہے تاں او کرسڳدے ۔ جیڑھا وی نواں مرحلہ شروع تھیسی، اوندے نال ایوی ایشن انڈسٹری اچ وقتی بہتری آسی۔