افواجِ پاکستان دی جرات و دلیری تے عوامی جوش و جذبے بھارت کوں ایجھا سبق سکھائے جیڑھا اونکوں ہمیشہ یاد رہسی، وزیراعظم شہباز شریف دا لیپ ٹاپ ونڈݨ دی تقریب نال خطاب

مظفر آباد۔ 24 دسمبر(اے پی پی) وزیراعظم محمد شہباز شریف آکھیے جو افواجِ پاکستان دی جرات و دلیری تے عوامی جوش و جذبے بھارت کوں ایجھا سبق سکھائے جیڑھا اونکوں ہمیشہ یاد رہسی، او ݙینھ پرے کائنی جݙاں مقبوضہ کشمیر دے عوام بھارت توں آزادی حاصل کریسن، قائداعظمؒ تے علامہ اقبالؒ دے خواباں دی تعبیر دا ویلھا آڳئے، ݙینھ رات محنت نال پاکستان کوں دنیا دا عظیم ملک بݨیسوں، پاکستان ایجوکیشن انڈوومنٹ فنڈ دا اجراء کرتے طلباء و طالبات کوں میرٹ تے نہ صرف اندرلے بلکہ ٻاہرلے ملک اعلیٰ تعلیم کیتے وی وظائف ݙیسوں۔ انھاں ا ڳالھ یونیورسٹی آف آزاد جموں و کشمیر مظفر آباد اچ میرٹ تے لیپ ٹاپ ونڈݨ دی تقریب نال خطاب کریندے آکھی اے۔ تقریب اچ وزیراعظم آزاد کشمیر فیصل ممتاز راٹھور، وفاقی وزراء عطا اللہ تارڑ، احسن اقبال، امیر مقام، مشیر وزیراعظم رانا ثناء اللہ، وزیراعظم یوتھ پروگرام دے چیئرمین رانا مشہود احمد خان، وائس چانسلر ناصر جمال خٹک تے یونیورسٹی دے سینکڑاں طلباء و طالبات شرکت کیتی۔وزیراعظم آکھیا جو آزاد کشمیر دے عوام پاکستان دی ترقی، خوشحالی تے عظمت کیتے قربانیاں ݙتن تے “کشمیر بݨسی پاکستان” دے نعرے کوں اپݨا نصب العین بݨائے۔ انھاں آکھیا جو مئی اچ بھارت نال تھیوݨ آلی جنگ اچ پاکستان دی مسلح افواج دی جرات و بہادری تے عوامی جوش و جذبے بھارت کوں ایجھا سبق سکھائے جیڑھا اونکوں ہمیشہ یاد رہسی۔ وزیراعظم آکھیا جو ݙینھ رات محنت پاروں پاکستان نہ صرف ترقی کریسی بلکہ دنیا دا عظیم ملک بݨسی۔ انھاں آکھیا جو اڄ جنھاں طلباء و طالبات کوں میرٹ تے لیپ ٹاپ ملئن انھاں اپݨے والدین تے اساتذہ دی محنت دا حق ادا کیتے، اے لیپ ٹاپ صرف ہک مشین کائنی بلکہ اعلیٰ تعلیم دے حصول تے باعزت روزگار کماوݨ دا ذریعہ اے۔وزیراعظم آکھیا جو لیپ ٹاپ سکیم تے اے آکھ تے تنقید کیتی ڳئی جو اے رشوت اے، پر اے ثابت تھی ڳئے جو اے رشوت کائنی بلکہ نوجواناں کوں اپݨے پیراں تے کھڑا کرݨ دا ذریعہ اے، نواز شریف نے وزیراعظم پاکستان تے میں وزیراعلیٰ پنجاب دی حیثیت نال اے پروگرام شروع کیتا ہئی تے اڄ تئیں ہک وی لیپ ٹاپ کہیں سفارش تے کائنی ݙتا ڳیا، صرف میرٹ تے محنت کرݨ آلے طلبہ اچ ونڈئے ڳئن۔ وزیراعظم آکھیا جو وفاق آزاد کشمیر اچ جیڑھے چار دانش سکول تعمیر کریندا پئے او تکھے تکمیل دی پاسے ودھدے پئن۔ انھاں آزاد کشمیر اچ دانش یونیورسٹی قائم کرݨ دا وی اعلان کیتا۔ وزیراعظم آکھیا جو وقتی پاکستان ایجوکیشن انڈوومنٹ فنڈ دا اجراء کرݙتا ویسی جیندے نال میرٹ تے وظیفے ݙتے ویسن۔