وزیراعظم شہباز شریف دی صدارت اچ معاشی ترقی کیتے بندرگاہواں دے حوالے نال نجی شعبے دے ورکنگ گروپ دا اجلاس

اسلام آباد۔ 24 دسمبر (اے پی پی) وزیراعظم محمد شہباز شریف ہدایت کیتی اے جو بندرگاہواں اچ پئے متروکہ کارگو دی نیلامی کیتے شفاف نظام گھن آیا ونڄے، پاکستان دی ساری بندرگاہواں دی توسیع تے کم تکھا کیتا ونڄے تاں جو وݙے جہاز لنگر انداز تھی سڳن۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت معاشی ترقی کیتے بندرگاہواں دے حوالے نال بݨائے ڳئے نجی شعبے دے ورکنگ گروپ دا اجلاس تھیا ۔ اجلاس اچ وفاقی وزراء احسن اقبال، احد خان چیمہ، محمد جنید انوار چوہدری، مصدق ملک، وزیرِ مملکت بلال اظہر کیانی، معاونِ خصوصی ہارون اختر تے متعلقہ اعلیٰ افسران شریک تھئن۔وزیراعظم کوں کاروباری برادری کیتے بندرگاہواں تے سہولتاں تے اصلاحات دے حوالے نال سفارشات پیش کیتیاں ڳئیاں۔ وزیراعظم آکھیا جو ملک اچ کاروبار ودھاوݨ تے معاشی ترقی کیتے ساݙی بندرگاہواں دا ٻہوں اہم کرداراے۔ وزیراعظم ہدایت کیتی جو کاروباری برادری دی سہولت کیتے بندرگاہواں نال جڑئے مختلف ادارے آپت اچ تعاون کوں ٻیا بہتر بݨاون تاں جو کارگو دا ڈویل ٹائم (Dwell Time) گھٹ توں گھٹ تھی سڳے، مختلف پورٹ چارجز کوں ٻیا گھٹ کیتا ونڄے۔ انھاں ہدایت کیتی جو متروکہ کارگو دی نیلامی کیتے ہک شفاف نظام گھن آیا ونڄے تے ایندے کیتے عالمی شہرت یافتہ کمپنیاں دی خدمات ڳھدیاں ونڄن۔ انھاں کارگو دی جانچ کیتے ابتدائی ٹیسٹنگ لیب بندرگاہواں تے ای بݨاوݨ دی ہدایت کریندے آکھیا جو کارگو دے غیر ضروری لیبارٹری ٹیسٹ دا خاتمہ کیتا ونڄے۔وزیراعظم آکھیا جو اندرلے ملک کارگو دے نقل و حمل کیتے بندرگاہواں توں ریل دی کنکٹیویٹی کوں ٻیا بہتر کیتا ونڄے۔ وزیراعظم زیاد بشیر دی سربراہی اچ ورکنگ گروپ دی محنت دی تعریف کیتی ۔ زیاد بشیر آکھیا جو پی آئی اے دی شفاف نجکاری نال پاکستان دی کاروباری برادری دے اعتماد اچ ٻہوں ودھارا تھئے۔ بریفنگ اچ ݙسایا ڳیا جو نیشنل پورٹس ماسٹر پلان تے کم تکھے جاری اے، تے پورٹ قاسم اچ فیساں اچ 50 فیصد توں ودھ کمی کیتی ڳئی اے۔ متروکہ کارگو دی نیلامی کیتے ٻہوں وقتی ای-بڈنگ دا نظام گھن آیا ویندا پئے جیندے نال کوئی وی شخص کتھائیں وی ٻہہ تے حصہ گھن سڳسی۔ ایں سلسلے اچ جیڑھا وی نواں کم شروع تھیسی، اوندے نال معاشی اوکھ اچ وقتی کمی تھیسی۔