بابائے قوم قائداعظم محمد علی جناحؒ دی دیانت، اصول پسندی، آئینی جدوجہد تے غیر متزلزل قیادت پاکستان دے قیام کوں ممکن بݨائے، سپیکر قومی اسمبلی

اسلام آباد۔ 24 دسمبر(اے پی پی) سپیکر قومی اسمبلی سردار ایاز صادق بانی پاکستان قائداعظم محمد علی جناحؒ کوں خراجِ عقیدت پیش کریندے آکھیے جو بابائے قوم دی دیانت، اصول پسندی، آئینی جدوجہد تے غیر متزلزل قیادت پاکستان دے قیام کوں ممکن بݨائے۔ بانی پاکستان قائداعظم محمد علی جناح دے 149 ویں یومِ ولادت دے موقع تے اپݨے پیغام اچ انھاں آکھیے جو قائداعظمؒ دی شخصیت تے انھاں دے افکار اڄ وی ساݙے آئینی، سیاسی تے جمہوری نظام کیتے مشعلِ راہ ہن۔ سپیکر قومی اسمبلی آکھیا جو قائداعظمؒ برصغیر دے مسلماناں کوں واضح سیاسی سمت ݙتی تے اتحاد، ایمان تے تنظیم دے رہنما اصولاں کوں اپنیندے ہک آزاد وطن دے خواب کوں حقیقت دا روپ ݙتا۔ انھاں آکھیا جو قائداعظمؒ قانون دی حکمرانی، مذہبی آزادی، مساوات تے سماجی انصاف تے مبنی فلاحی ریاست دا تصور ݙتا ہئی، قائداعظمؒ ہک ایجھی مضبوط، خودمختار تے فلاحی ریاست دے قیام چاہندن جتھاں ہر شہری بلاامتیاز رنگ و نسل مکمل مذہبی آزادی دے نال زندگی بسر کرسڳے۔سپیکر قومی اسمبلی آکھیا جو پاکستان 2026ء اچ بانی پاکستان دی 150 ویں یومِ ولادت مناوݨ ویندا پئے تے ایں تناظر اچ حکومتِ پاکستان ولوں 2026ء کوں ’’قائداعظم دا سال‘‘ قرار ݙتا ڳئے جیڑھا وقتی تے تاریخی اقدام اے۔ انھاں ایں اعتماد دا اظہار کیتے جو سال 2026ء قائداعظمؒ دے افکار، آئینی اصولاں دی پاسداری تے جمہوری اقدار دے ودھارے کوں نویں نسل تئیں منتقل کرݨ دا نادر موقع ݙیسی۔ سپیکر آکھیا جو تعلیمی، فکری تے سماجی سطح تے قائداعظمؒ دے پیغام کوں اجاگر کرݨا ویلھے دی لوڑھ اے تاں جو نوجوان نسل بانی پاکستان دے نظریات توں رہنمائی حاصل کریندے ملک دی ترقی، استحکام تے خوشحالی اچ مؤثر کردار ادا کر سڳے۔ انھاں ایں عزم دا اعادہ کیتا جو پارلیمان قائداعظمؒ دے افکار دی روشنی اچ آئین دی بالادستی، جمہوریت دے ودھارے، ملکی استحکام تے عوامی فلاح و بہبود کیتے اپݨا کردار ادا کریندی رہسی۔ ڈپٹی سپیکر قومی اسمبلی سید غلام مصطفیٰ شاہ وی یومِ قائداعظمؒ دے موقع تے انھاں کوں خراجِ عقیدت پیش کریندے اپݨے پیغام اچ آکھیے جو قائداعظم محمد علی جناحؒ دی جدوجہد، دیانت تے اصول پسندی پاکستان دی اصل شناخت اے۔