آئین موجب پاکستان اچ اقلیتاں کوں سارے سیاسی، معاشی تے سماجی حقوق حاصل ہن، سردار محمد یوسف

اسلام آباد۔ 24 دسمبر(اے پی پی) وزارتِ مذہبی امور و بین المذاہب ہم آہنگی اچ کرسمس دے حوالے نال تقریب دا انعقاد کیتا ڳیا۔ وفاقی وزیر مذہبی امور سردار محمد یوسف تے وزیرِمملکت کھیئل داس کوہستانی تقریب اچ بطور مہمانِ خصوصی شرکت کیتی تے مسیحی برادری دے رہنماواں دے رلے کرسمس دا کیک کٹیا۔ ایں موقع تے خطاب کریندے وفاقی وزیرسردار محمد یوسف آکھیا جو پاکستان تے پوری دنیا اچ موجود مسیحی برادری کوں کرسمس دی مبارخ ݙینداں، سارے مذاہب دی تعلیمات محبت، ہمدردی، امن تے رواداری تے مبنی ہن تے ساݙے کیتے مشعلِ راہ ہن۔ انھاں آکھیا جو مسیحی برادری پاکستان دی ترقی اچ ہمیشہ نمایاں کردار ادا کیتے، عدلیہ، افواج، تعلیم، صحت تے سارے شعبیں اچ اقلیتاں دی خدمات ناقابلِ فراموش ہن، آئین موجب پاکستان اچ اقلیتاں کوں سارے سیاسی، معاشی تے سماجی حقوق حاصل ہن۔وفاقی وزیر سردار محمد یوسف آکھیا جو بانیِ پاکستان قائداعظم محمد علی جناح 11 اگست 1947ء دی اپݨی تاریخی تقریر اچ آکھیا ہئی جو ہر کہیں کوں بلا تفریق رنگ و نسل تے مذہب دے برابر حقوق حاصل ہوسن۔ موجودہ حکومت اچ سارے صوبیں تے وفاقی کابینہ اچ اقلیتاں دی نمائندگی موجود اے، مسلم لیگ ن او واحد سیاسی جماعت اے جیں اقلیتی برادری بالخصوص مسیحی برادری دے حقوق دے تحفظ کوں یقینی بݨایا۔ ایں سال وی پاکستان اچ کرسمس دا تہوار سرکاری سطح تے منایا ویندا پئے۔ ایں مقصد کیتے جیڑھا وی نواں کم شروع تھیسی، اوندا مقصد امن دا ودھارا ہوسی۔