ای سی سی پاسکو دے 5 لکھ میٹرک ٹن کنڑک دے ذخائر کوں مسابقتی بولی دے ذریعے ویچݨ دی منظوری ݙے ݙتی

اسلام آباد۔ 28 جنوری (اے پی پی) کابینہ دی اقتصادی رابطہ کمیٹی (ای سی سی) پاسکو دے 5 لکھ میٹرک ٹن کنڑک دے ذخائر کوں مسابقتی بولی دے ذریعے ویچݨ دی منظوری ݙے ݙتی اے، اجلاس اچ کئی وزارتاں تے ڈویژناں کیتے تکنیکی ضمنی گرانٹس دی منظوری وی ݙتی ڳئی۔ اقتصادی رابطہ کمیٹی دا اجلاس بدھ دے ݙینہہ اتھاں وزارتِ خزانہ اچ وفاقی وزیرِ خزانہ تے محصولات سینیٹر محمد اورنگزیب دی صدارت اچ تھیا جیندے اچ اہم معاشی، مالی تے شعبہ جاتی معاملیاں دا جائزہ گھدا ڳیا۔ اجلاس دا مقصد مجموعی معیشت دے استحکام کوں یقینی بݨاوݨ، صارفین دے مفاداں دا تحفظ کرݨ، سماجی خدمات کوں تگڑا کرݨ تے اہم سرکاری اداریاں دی آپریشنل ضرورتاں کوں پورا کرݨا ہئی۔ اجلاس اچ وفاقی وزیر رانا تنویر حسین تے وفاقی وزیر سرمایہ کاری قیصر احمد شیخ دے علاوہ متعلقہ وزارتاں دے سیکرٹریز تے سینئر حکام شرکت کیتی۔اجلاس اچ پاسکو دے 5 لکھ میٹرک ٹن گندم دے ذخائر کوں مسابقتی بولی دے ذریعے ویچݨ دی منظوری ݙتی ڳئی، ایں قدم دا مقصد فالتو ذخائر دا موثر انتظام، سانبھݨ تے دیکھ بھال دے خرچیاں وچ کمی، ملک دی گندم مارکیٹ وچ قیمتاں کوں مستحکم رکھݨ تے غذائی تحفظ دے تقاضیاں دا تحفظ کرݨا اے ۔ ایں سلسلے اچ کمیٹی حکومتِ پنجاب دے محکمہ خوراک کوں پاسکو دی 3 لکھ میٹرک ٹن کنڑخ فراہم کرݨ دی منظوری وی ݙتی تاںجو اٹا ملاں کیتے کنڑخ دی فراہمی برقرار رہے، قیمتاں مستحکم رہن تے لوکاں کوں اٹے دی بلا تعطل فراہمی یقینی تھیوے۔ اجلاس اچ پاکستان پوسٹ آفس ڈیپارٹمنٹ (پی پی او ڈی) دے ذمے یوٹیلیٹی کمپنیاں دی رقم دی ادائیگی کیتے فنڈز دا جائزہ گھدا ڳیا اتے پچھلے کئی سالاں دے بقایاجات دی ادائیگی کیتے 10.98 ارب روپے دی تکنیکی ضمنی گرانٹ جاری کرݨ دی منظوری ݙتی ڳئی۔ اجلاس اچ وفاقی ڈائریکٹوریٹ آف امیونائزیشن کیتے 29.663 ارب روپے دی تکنیکی ضمنی گرانٹ دی منظوری وی ݙتی ڳئی تاں جو حفاظتی ٹیکہ جات دے پروگرام (ای پی آئی) دے تحت ویکسین تے سرنجاں دی خریداری جاری رہ سڳے۔ ایں قدم دا مقصد ملک بھر اچ حفاظتی ٹیکیاں دی کوریج کوں برقرار رکھݨ اے۔ اجلاس اچ وزارتِ تجارت دی درخواست تے درآمدی یوریا تے ݙتی ونڄݨ آلی سبسڈی کوں وفاقی تے صوبائی حکومتاں وچال ادھی ادھی (50-50) بنیاد تے ونڈݨ دی منظوری وی ݙتی ڳئی جیندے کیتے 23.42 ارب روپے دی تکنیکی ضمنی گرانٹ منظور کیتی ڳئی۔ ایندے اچوں 15 ارب روپے وزارتِ خزانہ جاری کریسی۔ پائیدار ترقیاتی اہداف (SDGs) دے تحت خیبر پختونخوا اچ ترقیاتی منصوبیاں کیتے وزارتِ ہاؤسنگ کوں 1.9 ارب روپے دی گرانٹ ݙتی ڳئی۔ کیڈٹ کالج حسن ابدال کیتے وی 150 ملین روپے دی تکنیکی گرانٹ منظور کیتی ڳئی تاں جو کالج دے انتظامی تے ترقیاتی کم چلدے رہن۔ اجلاس اچ فیڈرل بورڈ آف ریونیو (ایف بی آر) ولوں ضبط شدہ سولر پینلز کوں حکومتِ گلگت بلتستان اچ ونڈݨ دی منظوری وی ݙتی ڳئی۔ ایں قدم دا مقصد اوں علاقے اچ بجلی دی قلت تے قابو پاوݨ تے پائیدار توانائی کوں فروغ ݙیوݨ اے۔