حکومت کلی معیشت دے استحکام، مالی پائیداری تے مقابلے بازی تے مبنی ترقی تے نمو کیتے اقدامات کریندی پئی اے، ٹیکس سمیت کئی شعبیاں اچ ڈھانچہ جاتی اصلاحات دے پروگرام تے عمل تھیندا پئے، وفاقی وزیرِ خزانہ محمد اورنگزیب دی جرمن سفیر نال ملاقات اچ ڳالھ مہاڑ

اسلام آباد۔ 28 جنوری (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیے جو حکومت کلی معیشت دے استحکام، مالی پائیداری تے مقابلے بازی تے مبنی ترقی و نمو کیتے اقدامات کریندی پئی اے، ٹیکس سمیت کئی شعبیاں اچ ڈھانچہ جاتی اصلاحات دے پروگرام تے عمل تھیندا پئے ۔ انھاں اے ڳالھ بدھ دے ݙینہہ اتھاں جرمنی دی پاکستان اچ سفیر انالیپل نال ملاقات اچ آکھی اے۔ ملاقات اچ پاکستان تے جرمنی وچال معاشی تعلقات دی مجموعی صورتحال دا جائزہ گھدا ڳیا اتے تجارت، سرمایہ کاری تے ترقی دے شعبیاں اچ ݙوپاسہ تعاون کوں ودھاوݨ کیتے مسلسل رابطیاں دی اہمیت تے زور ݙتا ڳیا۔ ݙوہیں پاسوں معاشی رابطیاں کوں ٻیا گہرا کرݨ تے لمبی مدت دی ترقی کیتے ہک مستحکم، شفاف تے قابلِ پیش گوئی کاروباری ماحول دے فروغ کیتے آپݨے سانجھے عزم دا اعادہ کیتا۔ وزیرِ خزانہ حکومت دے مجموعی معاشی وژن تے اصلاحات بارے ترجیحات توں آگاہ کریندیں ہوئیں کلی معیشت دے استحکام، مالی پائیداری تے مقابلے بازی تے مبنی ترقی دی اہمیت کوں اجاگر کیتا۔ ملاقات اچ حکومت دے محصولات تے ٹیکس اصلاحات دے ایجنڈے تے وی تفصیلی ڳالھ مہاڑ تھئی۔ جرمن سفیر جاری اصلاحاتی اقدامات دا خیرمقدم کیتا تے کاروباری برادری نال تھیوݨ آلی ملاقاتاں دی روشنی اچ اپݨے مشاہدات ݙسے، جیندے اچ پالیسیاں دی وضاحت، تسلسل تے سرکاری اداریاں دے درمیان موثر مکالمے دی اہمیت تے زور ݙتا ڳیا۔