نیشنل پریس کلب صحافیاں دی تکڑی آواز اے، صحافی برادری دے مسئلیں دے حل کیتے وزارتِ اطلاعات اپݨا کردار ادا کریندی رہسی، وفاقی وزیر اطلاعات عطا اللہ تارڑ

اسلام آباد۔16مارچ(اے پی پی) وفاقی وزیر اطلاعات و نشریات عطا اللہ تارڑ آکھیے نیشنل پریس کلب صحافیاں دی تکڑی آواز اے، صحافی برادری دے مسئلیں دے حل کیتے وزارتِ اطلاعات اپݨا کردار ادا کریندی رہسی۔ اے ڳالھ انھاں اتھاں سینئرصحافی حاجی نواز رضا دی قیادت وچ ملاقات کیتے آئے نیشنل پریس کلب دے نویں منتخب صدرعبدالرزاق سیال تے سیکرٹری ڈاکٹر فرقان راؤ نال ڳالھ مہاڑ کریندے آکھی۔ وفاقی وزیر اطلاعات عطا اللہ تارڑ نیشنل پریس کلب دے انتخابات وچ کامیاب تھیوݨ الے ݙوہیں گروپاں “ڈیموکریٹس” تے “جرنلسٹ پینل” دے عہدیداراں کوں مبارخ ݙتی تے نویں منتخب ایگزیکٹو باڈی دے ارکان کیتے نیک تمناواں دا اظہار کیتا۔ملاقات وچ صحافی برادری کوں درپیش امور سودھے ٻئے اہم معاملات تے وی ڳالھ مہاڑ تھئی ۔ ایں موقع تے ڳالھ کریندے وفاقی وزیر اطلاعات آکھیا جو نیشنل پریس کلب صحافیاں دی تکڑی آواز اے جیڑھا صحافی برادری دے مسئلیں دے حل تے پیشہ ورانہ اقدار دے ودھارے وچ اہم کردار ادا کریندا پئے۔ انھاں آکھیا جو حکومت صحافیاں دی فلاح و بہبود تے میڈیا دے مسئلیں دے حل کیتے ہر ممکن تعاون جاری رکھیسی۔ وفاقی وزیر آکھیا جو صحافی برادری دے مسئلیں دے حل کیتے وزارتِ اطلاعات اپݨا کردار ادا کریندی رہسی، متعلقہ معاملات دے حل کیتے ہرممکن اقدامات کیتے ویسن۔ وفد دے ارکان وفاقی وزیراطلاعات کوں نیشنل پریس کلب دے نویں منتخب عہدیداراں دی حلف برداری دی تقریب وچ شرکت دی دعوت ݙتی جیڑھی عید الفطر دے بعد منعقد تھیسی۔ وفاقی وزیر حلف برداری دی تقریب وچ شرکت دی دعوت قبول کرڳھدی۔ ایں موقع تے وزیرِاعظم دے میڈیا کوآرڈینیٹر بدر شہباز وڑائچ، وفاقی سیکرٹری اطلاعات اشفاق احمد خلیل تے پرنسپل انفارمیشن افسر مبشر حسن وی موجود ہن۔