وزیرِاعظم دی پٹرولیم مصنوعات مقررہ ریٹاں تے ویچݨ یقینی بݨاوݨ دی ہدایت، حکومت عالمی کشیدگی پاروں کہیں وی صورتحال نال نبٹݨ کیتے تیار اے، شہباز شریف

اسلام آباد۔16مارچ(اے پی پی) وزیرِاعظم محمد شہباز شریف پٹرولیم مصنوعات دی مقررہ نرخاں تے فروخت یقینی بݨاوݨ دی ہدایت کریندے آکھیے حکومت عالمی سطح تے جاری کشیدگی دے پیشِ نظر کہیں وی قسم دی صورتحال نال نبٹݨ کیتے تیار اے۔ وزیرِاعظم محمد شہباز شریف دی زیرِ صدارت عالمی سطح تے کشیدگی پاروں ملکی معیشت دے استحکام تے عوام کوں ریلیف ݙیوݨ دے اقدامات دے حوالے نال جائزہ اجلاس تھیا۔ ایں اجلاس وچ نائب وزیراعظم و وزیرِ خارجہ محمد اسحاق ڈار، وفاقی وزیر خزانہ محمد اورنگزیب، وفاقی وزیر اقتصادی امور احد خان چیمہ، وفاقی وزیر پٹرولیم علی پرویز ملک، وفاقی وزیر اطلاعات و نشریات عطا اللہ تارڑ، وفاقی وزیر آئی ٹی شزا فاطمہ خواجہ، وزیرِ مملکت خزانہ بلال اظہر کیانی تے متعلقہ اداریں دے اعلیٰ افسر شریک تھئے۔وزیرِاعظم دفتر دے میڈیا ونگ ولوں جاری بیان دے مطابق اجلاس توں خطاب کریندے وزیرِاعظم آکھیا جو اڄوکی عالمی صورتحال دے پیشِ نظر عوام کوں ریلیف ݙیوݨ دے حوالے نال مزید اقدامات تے وی مشاورت جاری اے، حکومت دے بروقت فیصلے پاروں ایں وقت ملک وچ پٹرولیم مصنوعات دی مناسب مقدار موجود اے۔ وزیر اعظم آکھیا جو بدلدی ہوئی عالمی صورتحال پاروں ملک وچ معاشی استحکام قائم کرݨ کیتے بروقت بݨائی ڳئی کمیٹی دے فیصلے دی بدولت عوام کیتے تیل دی مسلسل فراہمی ممکن تھئی۔ انھاں آکھیا جو قومی سطح تے کفایت شعاری تے بچت دے اقدامات نافذ تھی چکن تے مزید تے کم جاری اے۔ کفایت شعاری دے سارے اقدامات تے عملدرآمد یقینی بݨاوݨ کیتے تھرڈ پارٹی آڈٹ دی ہدایت پہلے ہی جاری کیتی ونڄ چکی اے۔ انھاں معاشی استحکام تے عوام کیتے ریلیف کوں حکومت دی اولین ترجیح قرار ݙیندے ہوئیں آکھیا جو سارے اقدامات نہ صرف فوری ریلیف بلکہ طویل مدتی معاشی استحکام کوں ذہن وچ رکھیندے کیتے ویندے پئن۔وزیرِاعظم آکھیا جو حکومتِ پاکستان عالمی سطح تے جاری کشیدگی پاروں کہیں وی قسم دی صورتحال نال نبٹݨ کیتے تیار اے۔ انھاں پٹرولیم مصنوعات تقسیم کرݨ آلیاں (کمپنیاں) کوں حکومت دے مقررہ ریٹاں تے تیل دی ویچݨ یقینی بݨاوݨ تے ایں معاملے وچ شفافیت برقرار رکھݨ دی ہدایت کیتی۔ اجلاس وچ وزیرِاعظم کوں ملک وچ موجود تیل دے ذخیرے، فیول دی طلب پوری کرݨ کیتے پٹرولیم مصنوعات دی درآمدات تے عوام کوں عالمی کشیدگی دے پیشِ نظر ریلیف ݙیوݨ دے اقدامات تے بریفنگ ݙتی ڳئی جیندے وچ ݙسایا ڳیا جو حکومتِ پاکستان تیل دی مقررہ قیمت تے فروخت دی مسلسل نگرانی کریندی پئی اے، تیل دی مسلسل فراہمی تے ایندی مقررہ قیمت تے فروخت کوں یقینی بݨاوݨ کیتے “پاک ایپ” (Pak App) وچ صارفین کیتے فیچر شامل کر ݙتا ڳئے۔ ہݨ صارفین پاک ایپ دے ذریعے ملک وچ کہیں وی تیل دی عدم دستیابی یا مہانگے ریٹاں تے فروخت دے حوالے نال متعلقہ حکام کوں آگاہ کرسڳدن جیندے تے حکومت ولوں فوری اقدامات کیتے ویسن۔ اجلاس دے شرکاء گزریل جمعہ کوں وزیرِاعظم ولوں تیل دی قیمتاں وچ مزید اضافہ نہ کرݨ دے فیصلے دی تعریف کیتی۔