وزیراعظم شہباز شریف دی زیرِ صدارت وزارتِ قومی غذائی تحفظ و تحقیق تے پی اے آر سی دے امور بارے اجلاس

اسلام آباد۔ 17 مارچ (اے پی پی) وزیراعظم محمد شہباز شریف پاکستان زرعی تحقیقاتی کونسل (پی اے آر سی) دی تنظیمِ نو دی اصولی منظوری ݙیندے اینکوں چین دی اکیڈمی آف ایگریکلچرل سائنسز دی طرز تے زرعی تحقیق دے حوالے نال اعلیٰ تحقیقی ادارہ بݨاوݨ دی ہدایت کیتی اے تے آکھیے جو زرعی تحقیق دا زراعت تے غذائی تحفظ دے شعبے دے فروغ اچ کلیدی کردار اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت وزارتِ قومی غذائی تحفظ و تحقیق تے پی اے آر سی دے امور تے اجلاس تھیا۔ اجلاس اچ نائب وزیراعظم تے وزیرِ خارجہ محمد اسحاق ڈار، وفاقی وزیرِ اقتصادی امور احد خان چیمہ، وفاقی وزیرِ قومی غذائی تحفظ و تحقیق رانا تنویر حسین، وفاقی وزیرموسمیاتی تبدیلی مصدق ملک، وزیراعظم دے مشیررانا ثناء اللہ، وزیرِ مملکت خزانہ بلال اظہر کیانی، وزیراعظم دے معاونین خصوصی ہارون اختر تے طارق باجوہ، وزیراعظم دے کوآرڈینیٹر زراعت احمد عمیر تے متعلقہ اعلیٰ سرکاری افسراں شرکت کیتی۔اجلاس اچ وزیراعظم پی اے آر سی دی تنظیمِ نو دی اصولی منظوری ݙتی۔ وزیراعظم ہدایت کیتی جو ٹائم لائن دے نال پی اے آر سی دی تنظیمِ نو کیتے جامع پلان تیار کیتا ونڄے۔ انھاں آکھیا جو زرعی تحقیق دا زراعت تے غذائی تحفظ دے شعبے دے فروغ اچ کلیدی کردار اے۔ اجلاس کوں پی اے آر سی کوں زرعی تحقیق دے جدید دور دے تقاضیں نال ہم آہنگ ہک فعال ادارہ بݨاوݨ دے حوالے نال تفصیلی بریفنگ ݙتی ڳئی۔ قومی غذائی ضرورتاں پوریاں کرݨ تے زرعی شعبے دی برآمدات ودھاوݨ دے حوالے نال پی اے آر سی کوں ہک فعال ادارہ بݨاوݨ کیتے گورننس ڈھانچے اچ اصلاحات، بہترین تحقیقی عملے دی خدمات، بین الاقوامی شراکت داری، صوبائی حکومتاں دے نال بہتر رابطے تے کارکردگی دے واضح اہداف اصلاحاتی ایجنڈے دا حصہ ہن۔ پی اے آر سی دے تحت کم کرݨ آلے سارے تحقیقی مراکز کوں کٹھا کرتے پنج سنٹر آف ایکسیلنس بݨائے ویسن۔ اے سنٹرز زیادہ پیداوار آلے بج، اعلیٰ نسل دے مویشی، پریسیشن ایگریکلچر، فارم میکانائزشن تے ایندے اچ اے آئی دا استعمال تے زرعی شعبے دی برآمدات ودھاوݨ کیتے فوڈ پروسیسنگ دے شعبیں اچ تحقیق دا کم کریسن، زرعی تحقیق کوں انڈسٹری دے نال جوڑیا ویسی، جیندے نال کساناں دا فیدہ تھیسی۔