چیئرپرسن بینظیرانکم سپورٹ پروگرام دا شیخ زید ہسپتال رحیم یارخان دا دورہ، زخمی تریمتاں دی عیادت

اسلام آباد۔ 17 مارچ (اے پی پی) چیئرپرسن بینظیر انکم سپورٹ پروگرام سینیٹر روبینہ خالد شیخ زید ہسپتال رحیم یار خان دا دورہ کیتا جتھاں انھاں گزریل ݙینھ افسوسناک حادثے اچ زخمی تھیوݨ آلیاں تریمتاں دی عیادت کیتی۔ ایں موقع تے ایم پی اے سردار حبیب الرحمن، ہسپتال دے ایم ایس تے بی آئی ایس پی دے افسران وی موجود ہن۔ چیئرپرسن بی آئی ایس پی زخمی تریمتاں دی خیریت پچھی تے متعلقہ حکام کوں ہدایت کیتی جو متاثرین کوں بہترین طبی سہولتاں ݙیوݨ یقینی بݨایا ونڄے تے انھاں دی ہرممکن معاونت کیتی ونڄے۔میڈیا نمائندگان نال ڳالھ کریندے سینیٹر روبینہ خالد آکھیا جو واقعے دی مکمل تحقیقات جاری ہن تے ذمہ داران دے خلاف سخت قانونی کارروائی عمل اچ گھن آئی ویسی ۔ انھاں آکھیا جو بینظیر انکم سپورٹ پروگرام دے تحت وظائف دی رقم دی تقسیم پارٹنر بینکاں دے ذریعے کیتی ویندی اے، تاں جو ایں واقعے دے تناظر اچ متعلقہ بینک دی غفلت تے نوٹس جاری کریندے بھاری جرمانہ وی لاتا ڳئے۔ انھاں آکھیا جو انھاں دے دورے دا مقصد متاثرہ خانداناں نال ہمدردی تے یکجہتی دا اظہار کرݨ اے۔چیئرپرسن بی آئی ایس پی آکھیا جو جاں بحق تھیوݨ آلیاں تریمتاں دے لواحقین کوں فی کس 10 لکھ روپے جݙاں جو زخمیاں کوں فی کس 3 لکھ روپے ݙتے ویندے پئن۔ انھاں آکھیا جو زخمی تریمتاں دا علاج بالکل مفت کیتا ویسی تے متاثرہ خانداناں دے ٻالاں دے تعلیمی وظائف وی جاری رہسن تاں جو انھاں دی تعلیم متاثر نہ تھیوے۔ سینیٹر روبینہ خالد آکھیا جو پراݨے ادائیگی نظام دے تحت اے چھیکڑی قسط ادا کیتی ڳئی ہئی۔ صدرِ مملکت آصف علی زرداری تے وزیراعظم محمد شہباز شریف دی ہدایات موجب آندے سہ ماہی توں ادائیگیاں ڈیجیٹل والٹ دے ذریعے کیتیاں ویسن جیندے نال مستحق تریمتاں کوں باعزت، وقتی تے شفاف طریقے نال رقم ملسی۔انھاں آکھیا جو موجودہ نظام اچ رقم دی ونڈ پارٹنر بینکاں دے ذریعے کیتی ویندی پئی اے، تاں جو نویں نظام دے نفاذ نال بینک ریٹیلرز دی اجارہ داری دا خاتمہ تھیسی تے ادائیگی دا نظام مزید شفاف تے مؤثر بݨایا ویسی۔ سینیٹر روبینہ خالد حادثے اچ جاں بحق تھیوݨ آلیں بی آئی ایس پی دی چار مستحق تریمتاں انور مائی (چک 123)، پروین بی بی (چک 123)، شہناز خاتون (چک 125) تے علیمہ خاتون (چک 114) دے گھر وی ڳئن۔ انھاں مرحوم تریمتاں کیتے دعائے مغفرت کیتی، اہلخانہ نال تعزیت کیتی تے دلی ہمدردی دا اظہار کیتا۔ سینیٹر روبینہ خالد آکھیا جو بی آئی ایس پی ایں اوکھے ویلھے متاثرہ خانداناں دے نال کھڑے تے انھاں کوں ہر ممکن تعاون ݙتا ویسی۔