وزیراعظم شہباز شریف دی صدارت اچ اجلاس، نجی شعبے دی حوصلہ افزائی، گھراں دی تعمیر کیتے سوکھے قرضے سانڳے عملی اقدامات چاوݨ دی ہدایت

اسلام آباد۔ 18 مارچ (اے پی پی) وزیراعظم محمد شہباز شریف گھٹ آمدݨ آلے شہریاں کوں گھر دی سہولت ݙیوݨ کیتے نجی شعبے دی حوصلہ افزائی تے گھراں دی تعمیر کیتے سوکھے قرضے کوں حکومتی ترجیح قرار ݙیندے ایں حوالے نال عملی اقدامات چاوݨ دی ہدایت کیتی اے۔ وزیراعظم محمد شہباز شریف دی زیرِ صدارت وفاقی وزارتِ ہاؤسنگ و تعمیرات دے امور تے اجلاس ٻدھ کوں اتھاں وزیراعظم ہاؤس اچ منعقد تھیا جیندے اچ وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر ہاؤسنگ اینڈ ورکس ریاض پیرزادہ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیراعظم دے مشیررانا ثناء اللہ خاں، وزیر مملکت خزانہ و ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔ وزیراعظم آفس دے میڈیا ونگ دی طرفوں جاری بیان دے مطابق وزیراعظم اجلاس نال خطاب کریندے آکھیا جو گھٹ آمدݨ آلے طبقے کیتے رہائش دی فراہمی، سستے گھراں دے منصوبے بشمول نجی شعبے دی حوصلہ افزائی تے عوامی سہولتاں دی بہتری ساݙیاں ترجیحات اچ شامل اے۔ انہاں عام آدمی کوں ہاؤس فنانس دی سہولت مؤثر انداز اچ فراہم کرݨ کیتے عملی اقدامات چاوݨ دی ہدایت کیتی۔ اجلاس اچ وزارتِ ہاؤسنگ اینڈ ورکس دے سٹریٹجک روڈ میپ تے بریفنگ اچ ݙسایا ڳیا جو تعمیرات دے شعبے دے حوالے نال ٹیکس سٹرکچر اچ اصلاحات کیتیاں ویندیاں پئن، تعمیری شعبے کیتے ٹیکس سٹینڈرڈائزیشن تے فیڈرل بورڈ آف ریونیو تے صوبیں دی مشاورت جاری اے، ہاؤس مورگیج دے حوالے نال اصلاحات دے مسودے تے وی مشاورت جاری اے۔ وزیراعظم کوں ݙسایا ڳیا جو پبلک پرائیویٹ پارٹنرشپ دے تحت گھٹ آمدݨ آلیں کیتے گھراں دی تعمیر دے حوالے نال لائحہ عمل تیار کیتا ویندا پئے، رئیل سٹیٹ تے ہاؤسنگ دے شعبیں دے ضابطہ کار دے حوالے نال رئیل سٹیٹ ریگولیٹری اتھارٹی دا قیام عمل اچ گھن آیا ویسے ۔ ہاؤس فنانس دے حوالے نال رئیل سٹیٹ انویسٹمنٹ ٹرسٹ تے وزارتِ خزانہ، ایف بی آر، سکیورٹیز اینڈ ایکسچینج کمیشن تے صوبے وزارتِ ہاؤسنگ دے نال رل تے کم کریندے پئن۔