وزیراعظم محمد شہباز شریف دی زیرِصدارت رمضان ریلیف پیکیج 2026 دے حوالے نال جائزہ اجلاس

اسلام آباد۔ 18 مارچ (اے پی پی) وزیراعظم محمد شہباز شریف رمضان پیکیج دے تحت 90 فیصد دے نیڑے مستحقین کوں رقماں دی شفاف طریقے نال فراہمی تے سارے متعلقہ اداریں کوں شاندار خراجِ تحسین پیش کیتے۔ وزیراعظم محمد شہباز شریف دی زیرِ صدارت وزیراعظم رمضان ریلیف پیکیج 2026 دے حوالے نال جائزہ اجلاس اتھاں منعقد تھیا۔ اجلاس اچ وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر تخفیفِ غربت و سماجی تحفظ سید عمران احمد شاہ، وفاقی وزیر انفارمیشن ٹیکنالوجی و ٹیلی کام شزہ فاطمہ، وزیر مملکت خزانہ و ریلوے بلال اظہر کیانی، چیئرپرسن بے نظیر انکم سپورٹ پروگرام سینیٹر روبینہ خالد تے متعلقہ اعلیٰ سرکاری افسراں شرکت کیتی۔وزیراعظم کوں ݙسایا ڳیا جو وزیراعظم رمضان پیکیج 2026 دے تحت 89 فیصد مستحق لوکاں کوں ادائیگیاں کر ݙتیاں ڳئن۔ وزیراعظم رمضان پیکیج دے تحت مستحقین کوں رقماں دی شفاف منتقلی تے سارے اداریں کوں خراجِ تحسین پیش کریندے آکھیا جو “سوشل پروٹیکشن والٹس” پاکستان اچ فنانشل ٹیکنالوجیز تے شفافیت دے حوالے نال ہک ٻہوں اہم سنگِ میل تے کامیاب اقدام اے۔ وزیراعظم بے نظیر انکم سپورٹ پروگرام دی ساری ادائیگیاں سوشل پروٹیکشن والٹس دے ذریعے یقینی بݨاوݨ دی ہدایت کیتی۔ اجلاس اچ ݙسایا ڳیا جو پی ایم رمضان ریلیف پیکیج 2026 دے تحت ہݨ تئیں 1,955,620 ڈیجیٹل ٹرانزیکشنز کیتیاں ونڄ چکئن۔ ایں پیکیج دے حوالے نال ہک بھرپور آگاہی مہم چلائی ویندی پئی اے۔ پرنٹ، الیکٹرانک تے سوشل میڈیا تے آگاہی پیغامات دی وجہ توں مستحقین کوں پیکیج بارے ساری معلومات پُڄائیاں ڳئن۔ بریفنگ موجب 9999 ہیلپ لائن تے صارفین ولوں 1.7 ملین کالاں موصول تھیاں جݙاں جو ایں پروگرام بارے 2.7 ملین ایس ایم ایس (SMS) بھیڄے ڳئے۔ ایندے علاوہ اے پیکیج ملک اچ ڈیجیٹل نظام اچ صنفی تقسیم گھٹ کرݨ اچ ٻہوں کارگر ثابت تھئے۔