ریاض۔ 19 مارچ (اے پی پی) نائب وزیراعظم تے وزیرِ خارجہ اسحاق ڈار سعودی عرب دے دارالحکومت ریاض اچ عرب-اسلامی ملکاں دے وزرائے خارجہ دے اجلاس اچ شرکت کیتی جیندے اچ اڄوکی علاقائی صورتحال تے غور کیتا ڳیا۔ دفترِ خارجہ موجب سعودی عرب دی میزبانی اچ منعقدہ اجلاس اچ آذربائیجان، بحرین، مصر، اردن، کویت، لبنان، قطر، شام، ترکیہ تے متحدہ عرب امارات دے وزرائے خارجہ وی شرکت کیتی۔ اجلاس دے …
وزیرِ خارجہ اسحاق ڈار دی ریاض اچ عرب-اسلامی ملکاں دے وزرائے خارجہ دے اجلاس اچ شرکت
مزید خبراں
ریاض۔ 19 مارچ (اے پی پی) نائب وزیراعظم تے وزیرِ خارجہ اسحاق ڈار سعودی عرب دے دارالحکومت ریاض اچ عرب-اسلامی ملکاں دے وزرائے خارجہ دے اجلاس اچ شرکت کیتی جیندے اچ اڄوکی علاقائی صورتحال تے غور کیتا ڳیا۔ دفترِ خارجہ موجب سعودی عرب دی میزبانی اچ منعقدہ اجلاس اچ آذربائیجان، بحرین، مصر، اردن، کویت، لبنان، قطر، شام، ترکیہ تے متحدہ عرب امارات دے وزرائے خارجہ وی شرکت کیتی۔ اجلاس دے دوران نائب وزیرِاعظم خطے دے سارے بھرا ملکاں دی علاقائی سالمیت، خودمختاری تے سیاسی آزادی کیتے مکمل حمایت دا اظہار کیتا تے انھاں دی سرزمین دے خلاف سارے حملیں دے خاتمے دی لوڑھ تے زور ݙتا۔نائب وزیراعظم امتِ مسلمہ دے اتحاد دی اہمیت کوں اجاگر کریندے جاری جھیڑے دے دے فوری خاتمے دا مطالبہ کیتا تے ڳالھ مہاڑ تے سفارتکاری دے ذریعے مسئلیں دے حل کیتے پاکستان دے موقف دا اعادہ کیتا۔ اسحاق ڈار وسیع تر خطے کوں متاثر کرݨ آلے موجودہ بحران دی بنیادی وجوہات نال نبٹݨ دی لوڑھ تے زور ݙیندے اسرائیل دی طرفوں علاقائی ملکاں دے خلاف جاری جارحیت تے اشتعال انگیزیاں دی شدید ترین لفظاں اچ مذمت کیتی۔ انھاں شہریاں دے خلاف بلاجواز حملیں دے نال نال توانائی تے اہم بنیادی ڈھانچے کوں نشانہ بݨاوݨ دی وی مذمت کیتی تے ایجھے سارے اقدامات دے وقتی خاتمے دا مطالبہ کیتا۔ انھاں ایں ڳالھ تے وی زور ݙتا جو ایجھے اقدامات توں گریز کیتا ونڄے جیڑھے خطے تے ایندے توں ٻاہر توانائی دے تحفظ کوں متاثر کرسڳدن تے عالمی معاشی چیلنجز کوں مزید ودھا سڳدن۔نائب وزیراعظم شرکاء کوں بحران دے حل کیتے پاکستان دی جاری سفارتی کوششاں دا وی ݙسایا تے ایں عزم دا اعادہ کیتا جو پاکستان علاقائی سلامتی دے چیلنجز نال نبٹݨ اچ تعمیری کردار ادا کریندا رہسی۔ اجلاس دے اختتام تے عرب-اسلامی ملکاں ہک مشترکہ اعلامیہ وی جاری کیتا۔ سینیٹر محمد اسحاق ڈار دورے دے دوران حکومت تے پاکستان دے عوام دی طرفوں سعودی عرب دے وزیرِ خارجہ شہزادہ فیصل بن فرحان السعود کوں بھرپور یکجہتی تے غیر متزلزل حمایت دا پیغام وی پڄایا۔ وزارتی اجلاس دے موقع تے نائب وزیرِاعظم ترکیہ دے وزیرِ خارجہ ہاکان فیدان تے آذربائیجان دے وزیرِ خارجہ جیہون بیراموف نال ݙو طرفہ ملاقاتاں وی کیتیاں جنھاں اچ تازہ علاقائی صورتحال تے ڳالھ کیتی ڳئی۔ نائب وزیراعظم تے وزیرِ خارجہ مصر، پاکستان، سعودی عرب تے ترکیہ دے وزرائے خارجہ دے چار ملکی اجلاس اچ وی شرکت کیتی جیڑھا ایں موقع تے منعقد تھیا۔
