آئی ایس پی آر یومِ پاکستان 2026 دا نواں قومی ڳاوݨ “میری مٹی میری جان” ریلیز کرݙتا

اسلام آباد۔ 20 مارچ (اے پی پی) پاک فوج دے شعبہ تعلقاتِ عامہ (آئی ایس پی آر) یومِ پاکستان دے پُرمسرت موقع تے نواں قومی ڳاوݨ “میری مٹی میری جان” دا پرومو جاری کر ݙتے۔ اے نغمہ ہک ایجھے ویلھے سامݨے آئے جݙاں اڄوکا سال عید تے یومِ پاکستان دی مشترکہ خوشیاں قومی کامیابیاں دی چھاں اچ منائیاں ویندیاں پئن۔ آئی ایس پی آر دے مطابق “میری مٹی میری جان” محض ہک گاوݨ کائنی بلکہ پاکستانی قوم دے اجتماعی فخر، سچی پاکستانیت تے مشترکہ جذبیں دی خوبصورت عکاسی اے۔اے نغمہ آپریشن بنیان مرصوص دی شاندار کامیابی دے بعد قوم دے حوصلیں کوں ٻیا ودھاوݨ تے قومی روح کوں بیدار کرݨ کیتے تیار کیتا ڳئے۔ ایں نغمے دی خاص ڳالھ ایندی جدید موسیقی تے منفرد انداز اے، جینکوں خاص طور تے نویں نسل دے ذوق موجب ڈھالیا ڳئے۔ دلکش کورس تے پُرجوش دھناں دے نال اے نغمہ نینگراں دے دل دی دھڑکن بݨ ڳئے تے انھاں دے حب الوطنی دے جذبیں کوں زبان ݙیندے۔ ترجمان دا آکھݨ اے جو اے نغمہ نہ صرف یومِ پاکستان دی مناسبت نال اہمیت رکھیندے، بلکہ آوݨ آلے ݙینھاں اچ وی اے قومی یکجہتی، ہم آہنگی تے ملکی وقار دی علامت بݨ تے گجدا رہسی۔