چیئرمین سینیٹ دی عیدالفطر دے بابرکت موقع تے امتِ مسلمہ تے بالخصوص پاکستانی قوم کوں مبارخ

اسلام آباد۔ 21 مارچ (اے پی پی) چیئرمین سینیٹ سید یوسف رضا گیلانی عیدالفطر دے بابرکت موقع تے امتِ مسلمہ تے بالخصوص پاکستانی قوم کوں مبارخ ݙیندے ہوئے ایں عزم دا اظہار کیتے جو ایں مقدس ݙینھ دی حقیقی روح کوں اپنائے ہوئے عالمی سطح تے امن، یکجہتی تے بھرپی دے ودھارے کیتے مشترکہ کوششاں کیتیاں ویسن۔سینیٹ سیکرٹریٹ میڈیا ڈائریکٹوریٹ توں جاری آپݨے خصوصی پیغام اچ انھاں آکھیے جو عیدالفطر محض خوشی دا تہوار کائنی بلکہ شکر گزاری، اخوت تے انسانی ہمدردی دا عملی مظہر اے، جیڑھا رمضان المبارک دی روحانی تربیت دے بعد اساکوں اجتماعی ذمہ واریاں دا احساس ݙویندے۔ انھاں زور ݙتا جو اساکوں انفرادی و اجتماعی سطح تے برداشت، رواداری تے محبت کوں ودھارا ݙیوݨا ہوسی تاں جو ہک پرامن معاشرے دی بنیاد رکھی ونڄ سڳے۔ چیئرمین سینیٹ خاص طور تے دنیا اچ جاری جھیڑے عدم استحکام تے چیلنجاں تے تشویش دا اظہار کریندے عالمِ اسلام توں اپیل کیتی جو سانجھے اختلافات کوں پچھوں سٹ تے اتحاد و یگانگت کوں ودھارا ݙیوو۔ انھاں آکھیا جو اڄ دے حالات ایں ڳالھ دے متقاضی ہن جو مسلم امہ اجتماعی دانش تے حکمت دے نال مسئلیں دا حل تلاش کرے تے دنیا اچ امن و امان دے قیام کیتے آپݨا مؤثر کردار ادا کرے۔انھاں دعا کیتی جو اللہ تعالیٰ عالمِ اسلام کوں درپیش مشکلاں دا خاتمہ فرماوے، جنگ زدہ علاقیں اچ وسݨ آلے مسلماناں تے آپݨی رحمت نازل کرے تے دنیا کوں پائیدار امن، استحکام تے خوشحالی نال ہمکنار کرے۔ سید یوسف رضا گیلانی ایں موقع تے قوم کوں تلقین کیتی جو عید دی خوشیاں اچ مستحق تے کمزور طبقیں کوں شامل کیتا ونڄے تاں جو معاشرتی ہم آہنگی کوں ودھارا ۔ انھاں مزید آکھیا جو پاکستان دی ترقی تے استحکام قومی اتحاد، قانون دی بالادستی تے جمہوری اقدار دے فروغ نال ای ممکن اے۔ آخر اچ انھاں دعا کیتی جو اللہ تعالیٰ ایں عید کوں پوری امتِ مسلمہ کیتے رحمت، برکت تے خوشیاں دا ذریعہ بݨاوے تے پاکستان کوں امن، ترقی تے استحکام دی راہ تے گامزن رکھے