عیدالفطردرحقیقت ماہِ رمضان دی عبادات، صبر، تقویٰ تے ایثار دا صلہ اے، صدرِ مملکت دا عیدالفطر تے پیغام

اسلام آباد۔ 21 مارچ (اے پی پی) صدرِ مملکت آصف علی زرداری پوری پاکستانی قوم کوں عیدالفطر دی خوشیاں بھری ساعتاں تے دلی مبارخ پیش کریندے آکھیے جو عیدالفطر درحقیقت ماہِ رمضان دی عبادات، صبر، تقویٰ تے ایثار دا صلہ اے۔ صدرِ مملکت عیدالفطر دے موقع تے آپݨے پیغام اچ آکھیا جو اے ݙینھ اساکوں اللہ تعالیٰ دی رحمت، مغفرت تے بندگی دے احساس دے نال ہک نویں روحانی زندگی دا آغاز کرݨ دا پیغام ݙیندے۔اللہ تعالیٰ قرآنِ مجید اچ ارشاد فرمیندے ”اے ایمان والو! تساں تے روزے فرض کیتے ڳئن تاں جو تساں اچ تقویٰ پیدا تھیوے“۔ انھاں آکھیا جو عید دا اصل پیغام تقویٰ، خود احتسابی تے اخلاقی طہارت اے۔ رسولِ اکرم ﷺ فرمایا ”جیڑھا شخص ایمان تے ثواب دی خاطر روزہ رکھیندے، اوندے اڳلے پچھلے سارے گناہ معاف کر ݙتے ویسن“۔ صدرِ مملکت آکھیا جو اے ݙینھ اساکوں یاد ݙویندے جو رمضان المبارک اچ حاصل کیتی گئی تربیت کوں آپݨی عملی زندگی اچ برقرار رکھݨ ای حقیقی کامیابی اے۔ صبر، برداشت، ہمدردی، عدل تے اخوت او اقدار ہن جیڑھیاں نہ صرف ہک مثالی فرد بلکہ ہک مضبوط تے متحد قوم دی بنیاد بݨدئن۔انھاں آکھیا جو عیدالفطر دا ݙینھ سانجھی محبت، بھرپی تے سماجی ہم آہنگی کوں ودھارا ݙیوݨ دا ݙینھ اے، اے اساکوں ایں ڳالھ دی تلقین کریندے جو اساں آپݨے چودھارموجود ضرورت منداں، یتیماں تے محروم طبقیں کوں آپݨی خوشیاں اچ شریک کروں تے معاشرے اچ احساسِ ذمہ داری کوں مضبوط کروں۔ صدرِ مملکت آکھیا جو اڄ دے ݙینھ اساکوں قومی یکجہتی، آئینی بالادستی تے قانون دی پاسداری دے عزم دی تجدید وی کرݨی چاہیدی اے۔ انھاں آکھیا جو پاکستان دی ترقی، استحکام تے خوشحالی اساں ساریں دی مشترکہ ذمہ واری اے۔صدرِ مملکت دعا کیتی جو اللہ تعالیٰ اساکوں توفیق ݙیوے جو خطے اچ آئی مصیبتاں دا ایویں مقابلہ کروں جو مسلم امّہ دا اتحاد قائم رہے تے دنیا اچ امن قائم تھیسی۔ صدرِ مملکت آکھیا جو میں دعا گو ہاں جو اللہ تعالیٰ اساݙی عبادات کوں قبول فرماوے، پاکستان کوں امن و سلامتی تے استحکام نال نوازے تے اساکوں اتحاد و اتفاق دے نال اڳوں ودھݨ دی توفیق عطا فرمائے۔ آمین