عیدالفطر ایثار، اتحاد، خدمتِ خلق تے اجتماعی ذمہ واری دے احساس کوں تازہ کرݨ دا موقع اے، وزیراعظم دا عیدالفطر تے پیغام

لاہور۔ 21 مارچ (اے پی پی) وزیرِاعظم محمد شہباز شریف پاکستان تے دنیا بھر دے مسلماناں کوں عیدالفطر دی مبارخ ݙیندے امتِ مسلمہ اچ مزید اتحاد دی لوڑھ تے زور ݙتے تے آکھیے جو ایجھے ویلھے اچ جݙاں دنیا غیر یقینی صورتحال تے عدم استحکام دا شکار اے، اساݙا اتحاد ای اساݙی ساریں توں وݙی طاقت اے۔ وزیرِاعظم دفتر دے میڈیا ونگ توں جاری بیان موجب وزیرِاعظم آکھیا جو او عیدالفطر دے بابرکت تے پُرمسرت موقع تے پاکستان سودھے پوری امتِ مسلمہ کوں مبارخ ݙٰیندن۔ انھاں آکھیا جو اڄ دا مبارک ݙینھ اساݙے کیتے اللہ دی خاص رحمت تے بے پایاں فضل و کرم دا مظہر اے۔ اڄ دے ݙینھ سارے مسلمان اللہ تعالیٰ دا شکر ادا کریندن جو رمضان المبارک دی خصوصی عبادات دے بعد عید سعید دی خوشی نصیب فرمائی۔ انھاں دعا کیتی جو اللہ تعالیٰ اساݙی عبادات کوں منزلِ قبولیت تے اسلامی اقدار کوں آپݨی عملی زندگی اچ رائج کرݨ دی توفیق عطا فرماوے۔وزیرِاعظم آکھیا جو عیدالفطر ایثار، اتحاد، خدمتِ خلق تے اجتماعی ذمہ واری دے احساس کوں وی تازہ کرݨ دا موقع اے۔ بحیثیت قوم اساکوں عید دے ݙینھ معاشرے دے کمزور طبقیں کوں خوشیاں بھرے لمحیں اچ شریک رکھݨا ہوسی۔ انھاں آکھیا جو رمضان المبارک اچ حکومت کمزور طبقیں دی باعزت مالی معاونت کیتے ڈیجیٹل والٹس دا نظام خوش اسلوبی نال مکمل کیتا۔ اجتماعی ذمہ واری تے سانجھا تعاون ای اصل اچ ملکی ترقی و خوشحالی دا ضامن اے۔وزیرِاعظم آکھیا جو عید دی خوشیاں تے شکرگزاری دے ایں موقع تے وی اساݙے دل غزہ تے مشرقِ وسطیٰ اچ جھیڑے توں متاثرہ ٻئے لوکاں کیتے غمگین ہن۔ انھاں دی تکلیف ایں ڳالھ دی واضح یاد ݙویندی اے جو امتِ مسلمہ اچ مزید اتحاد دی ٻہوں لوڑھ اے تاں جو اساں رل تے انصاف، وقار تے پائیدار امن کوں ودھارا ݙے سڳوں۔ ایجھے ویلھے اچ جݙاں دنیا غیر یقینی تے عدم استحکام دا شکار اے، اساݙی ساریں توں وݙی طاقت اساݙا اتحاد ای اے۔ انھاں دعا کیتی جو اے عید امتِ مسلمہ اچ بھرپی دے جذبے کوں مزید ودھارا ݙیوے تے اساکوں انسانیت دی بھلائی کیتے رل تے کم کرݨ دی توفیق ݙیوے۔انھاں آکھیا جو پاکستانی من حیث القوم دنیا بھر اچ امن و سلامتی تے استحکام کیتے دعا گو تے اللہ دے حضور دست بدعا ہن جو عید دی مبارک گھڑیاں عالمی امن، عدل و انصاف، رواداری تے بھرپی دی فضا کوں تقویت ݙیون