وزیراعظم دے وقتی اقدامات پاروں ملک اچ تیل دے وافر ذخیرے موجود ہن، پٹرولیم مصنوعات دی بچت کیتے عوام دا تعاون ضروری اے، عطا اللہ تارڑ

لاہور۔ 21 مارچ (اے پی پی) وفاقی وزیرِ اطلاعات و نشریات عطا اللہ تارڑ آکھیے جو وزیراعظم شہباز شریف دے وقتی اقدامات پاروں ملک اچ تیل دے وافر ذخیرے موجود ہن، حکومت عوام تے ٻیا ٻوجھ کائنی سٹݨ چاہندی، کفایت شعاری مہم دے تحت 50 فیصد گاݙیاں گراؤنڈ کر ݙتیاں ڳئن، پٹرولیم مصنوعات دی بچت کیتے عوام دا تعاون ضروری اے۔ اتھاں وفاقی وزیرِ پٹرولیم علی پرویز ملک دے رلے میڈیا نال ڳالھ کریندے وفاقی وزیرِ اطلاعات آکھیا جو وزیراعظم شہباز شریف موجودہ صورتحال پاروں دوراندیشی دا مظاہرہ کریندے تیل دے ذخیرے کوں پورا کرݨ کیتے وقتی فیصلے کیتے۔ انھاں آکھیا جو وزیرِ پٹرولیم علی پرویز ملک تے انھاں دی ٹیم ملک اچ پٹرولیم مصنوعات دی کہیں قسم دی قلت پیدا نہ تھیوݨ کیتے بھرپور محنت کیتی۔ وفاقی وزیر آکھیا جو خطے دے کئی ملک راشننگ دی طرف چلئے ڳئن انھاں ہک نظام بݨا ݙتے جتھاں تیل دستیاب ای کائنی۔ انھاں آکھیا جو وزیراعظم وقتی کمیٹی بݨائی تے خود روزانہ دی بنیاد تے جائزہ اجلاس دی صدارت کریندے رہ ڳئے جیندے نتیجے اچ پاکستان اچ تیل دے ذخیرے مناسب مقدار اچ موجود ہن جݙاں جو مستقبل دے کارگوز دا بندوبست وی کیتا ویندا پئے۔انھاں آکھیا جو پٹرولیم مصنوعات دی قلت نہ تھیوݨ دا اے مطلب کائنی جو وسائل کوں ضائع کیتا ونڄے، ملک اچ موجود تیل دے ذخیرے ٻہوں مہانگے ہن جݙاں جو خلیجی ملکاں توں درآمد تھیوݨ آلے تیل دی قیمت 70 ڈالر فی بیرل توں ودھ تے 158 ڈالر فی بیرل تئیں پڄ چکی اے جیندے اثرات پاکستان تے وی مرتب تھئن۔ انھاں آکھیا جو پاکستان اچ دستیاب تیل دی قیمتاں دا تعین عالمی منڈی موجب تھیندے تے ایں صورتحال اچ پاکستان دا کوئی قصور کائنی تاں جو بھرپور کوشش کیتی ڳئی اے جو عوام تے ٻیا ٻوجھ نہ پاتا ونڄے۔وفاقی وزیر آکھیا جو وزیراعظم شہباز شریف ایں معاملے تے تشویش رکھیندن تے انھاں واضح کیتا جو حکومت کفایت شعاری تے سادگی کوں اپنیندے عوام تے اضافی ٻوجھ کائناں سٹیسی۔ وفاقی وزیرِ اطلاعات آکھیا جو اساں آپݨی آپݨی وزارتاں دے ذمہ وار ہیسے تے کفایت شعاری اقدامات تے عمل پیرا ایسے۔ انھاں آکھیا جو ہدایت موجب 60 فیصد سرکاری گاݙیاں گراؤنڈ کرݨ، تیل دے استعمال اچ 50 فیصد کمی تے ٻئے بچت اقدامات تے عمل درآمد یقینی بݨایا ویندا پئے تاں جواے ہک اجتماعی مسئلہ اے جیندے حل کیتے قومی سطح تے تعاون درکار اے۔انھاں عوام کوں آکھیا جو تیل دی بچت کیتے غیر ضروری سفر توں گریز کرن، کار پولنگ دا سسٹم اپناون، ہک گاݙی استعمال کرن، جنھاں کنے ھک توں ودھ گاݙیاں ہن ، او چھوٹی کپیسٹی آلی گاݙی استعمال کرن تاں جو ایندھن دی بچت ممکن تھی سڳے تے ایں مقصد کیتے پوری قوم کوں مشترکہ کوششاں کرݨیاں ہوسن۔ وفاقی وزیرِ اطلاعات آکھیا جو حکومت آپݨی سطح تے اقدامات کیتے جنھاں دے مثبت نتیجےسامݨے آئن۔ گزریل ہفتے پٹرول دی قیمت اچ 50 روپے تے ڈیزل دی قیمت اچ 74 روپے ودھارے دی سمری آئی، تاں جو وزیراعظم بچت تے ترقیاتی بجٹ اچ کٹوتی کرتے 24 ارب روپے دی خطیر رقم نال عوام تے اے ٻوجھ کائنی پووݨ ݙتا۔ انھاں آکھیا جو اڄوکے ہفتے عالمی منڈی اچ قیمتاں اچ مزید ودھارا تھئے جیندے مجموعی حجم تقریباً 45 ارب روپے بݨدا ہئی تاں جو اے رقم وی ترقیاتی بجٹ توں ایڈجسٹ کرتے عوام کوں ریلیف ݙتا ڳیا۔وفاقی وزیرِ اطلاعات آکھیا جو ݙوہیں ہفتے کوں ملا تے وفاقی حکومت 69 ارب روپے دا ٻوجھ خود برداشت کیتا، نتاں پٹرول دی قیمت اچ مجموعی طور تے تقریباً 150 روپے تئیں اضافہ تھی سڳدا ہئی تاں جو اے ودھارا روک ݙتا ڳئے۔ انھاں آکھیا جو اے اقدام طویل مدت کیتے ممکنہ طور تے قابلِ عمل کائنی کیوں جو ایندے توں غریب دے نال نال امیر طبقہ وی یکساں طور تے فیدہ چا گھندے۔ عطا اللہ تارڑ آکھیا جو وزیراعظم دی ہدایت دے مطابق ایجھا مؤثر میکنزم وضع کرݨ دی لوڑھ اے جیندے تحت صرف غریب تے مستحق طبقیں کوں ریلیف ݙتا ونڄے جݙاں جو جیڑھے بندے اخراجات برداشت کر سڳدن او آپݨا ٻوجھ خود چاون۔انھاں آکھیا جو پوری قوم کوں متحد تھی تے تیل دی بچت کیتے اقدامات کرݨے ہوسن تے حکومت دی طرفوں یقینی بݨائے ڳئے ذخیرے کوں اضافی دستیابی سمجھ تے ضائع کرݨ دے بجائے محفوظ رکھݨا ہوسی کیوں جو پاکستان تیل درآمد کریندے تے زرِمبادلہ دے ذخیرے دے تحفظ کیتے اجتماعی کوشش ناگزیر اے۔ انھاں آکھیا جو جتھاں حکومت آپݨا کردار ادا کریندی پئی اے اتھاں اشرافیہ تے پوری قوم کوں وی اڳوں ودھ تے بچت اچ حصہ پاوݨا ہوسی۔ انھاں دا آکھݨ ہئی جو عالمی منڈی اچ قیمتاں اچ مزید اضافے تے خطے اچ جاری کشیدگی دے پیشِ نظر مستقبل دی منصوبہ بندی ضروری اے، ایں کیتے ہر پاکستانی کوں تیل دی بچت کیتے آپݨا کردار ادا کرݨا ہوسی۔وفاقی وزیرِ اطلاعات آکھیا جو وزیراعظم واضح کیتے جو او عید دے موقع تے قوم تے اضافی ٻوجھ کائنی سٹݨ چاہندے تے عوام کوں ریلیف ݙتا ڳئے تاں جو لوک آپݨے اہل و عیال دے نال عید دی خوشیاں منا سڳن۔ انھاں آکھیا جو وفاق تے صوبائی حکومتاں دے کفایت شعاری اقدامات تے عملدرآمد کرݨا ہوسی تے آوݨ آلے ݙینھاں کیتے پیشگی تیاری ضروری اے تاں جو ٻوجھ ٻیا نہ ودھے۔ انھاں آکھیا جو حکومت ایں صورتحال تے گہری نظر رکھی کھڑی اے تے وزیراعظم ذاتی طور تے ایں حوالے نال فکرمند ہن، حکومت ساریں توں پہلے آپݨے خرچے گھٹا تے بچت اقدامات تے عملدرآمد کیتا جیندے توں حاصل تھیوݨ آلا فیدہ عوام کوں منتقل تھیا تاں جو ہݨ ٻئی احتیاط دی لوڑھ اے۔ عطا اللہ تارڑ آکھیا جو وزیراعظم، فیلڈ مارشل، نائب وزیراعظم تے حکومت دی اولین ترجیح عوام کوں سہولت ݙیوݨ تے انھاں دے مفادات دا تحفظ اے، ہݨ ویلھا آڳئے جو آوݨ آلے ݙینھاں کیتے تیاری کیتی ونڄے تے ہک ذمہ وار قوم ہووݨ دا عملی مظاہرہ کیتا ونڄے۔