وزیرِاعظم دا بحرین دے شاہ حمد بن عیسیٰ الخلیفہ کوں ٹیلیفون،عید دی مبارخ ݙتی

لاہور۔ 21 مارچ (اے پی پی) وزیرِاعظم محمد شہباز شریف بحرین دے شاہ حمد بن عیسیٰ الخلیفہ کوں خطے اچ امن دی بحالی کیتے پاکستان دی سفارتی کوششاں تے اعتماد اچ گھندے ہوئے یقین ݙیوائے جو پاکستان جنگ دے خاتمے کیتے ساری سفارتی کوششاں دی حمایت جاری رکھیسی۔وزیرِعظم دفتر دے میڈیا ونگ توں جاری بیان موجب وزیرِ اعظم محمد شہباز شریف بحرین دے شاہ حمد بن عیسیٰ الخلیفہ کوں ٹیلیفون کیتا، گرمجوش تے دوستانہ ڳالھ مہاڑ اچ وزیراعظم نے شاہ حمد تے بحرین دے بھرا عوام کوں عید دی مبارخ ݙتی۔ شاہ حمد وی وزیراعظم کوں عید دی مبارخ ݙتی تے نیک خواہشات دا اظہار کیتا۔ ݙوہیں رہنماواں امت دی صفاں اچ اتحاد تے ہم آہنگی کیتے دعا کیتی۔وزیراعظم خطے اچ جاری جنگ بالخصوص بحرین دے خلاف کیتے ڳئے حملیں دی شدید مذمت دا اعادہ کریندے بحرین اچ تھیوݨ آلے حملیں اچ قیمتی جاناں دے ضیان تے زخمیاں تے ٻہوں ݙکھ تے افسوس کیتا۔ وزیرِاعظم بحرین دی طرفوں صبر تے تحمل دی تعریف کریندے اوکھے ویلھے اچ بحرین تے ایندے عوام کیتے پاکستان دی یکجہتی تے حمایت دا اعادہ کیتا۔ وزیراعظم بحرین دے بادشاہ کوں خطے اچ امن دی بحالی کیتے پاکستان دی سفارتی کوششاں دا وی ݙسایا ۔ انھاں بحرین دے بادشاہ کوں یقین ݙوایا جو پاکستان جاری جنگ دے خاتمے کیتے ساریاں سفارتی کوششاں دی حمایت جاری رکھیسی۔ ݙوہیں رہنماواں ݙو طرفہ تے علاقائی امور تے نیڑے رابطے اچ رہݨ تے اتفاق کیتا۔