آزادی دی نعمت اساݙے اسلاف دے تدبر، عزم، استقامت تے قربانیاں دا منہ بولیندا ثبوت اے: وزیرِ اعظم دا یومِ پاکستان تے سنیھا

لاہور (اے پی پی) وزیرِ اعظم محمد شہباز شریف یومِ پاکستان دے تاریخ ساز قومی ڈینہہ تے پوری قوم کوں دل دی گہرائیاں توں مبارکباد ݙیندے ہوئیں آکھیا جو 23 مارچ جنوبی ایشیا دی تاریخ وچ اہم سنگِ میل دی حیثیت رکھیندے تے ایں تاریخی ڈینہہ دی یاد ݙویندے جݙݨ چھیاسی (86) برس پہلے برصغیر پاک و ہند دی مسلم قیادت اپنے غیر متزلزل عزم دے نال ہک آزاد وطن دی بنیاد رکھݨ کیتے متحد تھئی ہئی۔ فکرِ اقبال توں رہنمائی حاصل کریندے ہوئیں مسلم قائدین اج دے ڈینہہ ہک ایجھی ریاست دا تصور پیش کیتا ہئی جتھاں مسلماناں دے آئینی تے سیاسی حقوق کوں تحفظ حاصل ہووے تے او وقار، آزادی تے عزتِ نفس دے نال زندگی گزار سڳن۔وزیرِ اعظم آفس دے میڈیا ونگ ولوں جاری بیان دے مطابق وزیرِ اعظم یومِ پاکستان تے اپنے پیغام اچ آکھیا جو 23 مارچ 1940 دے تاریخی ڈینہہ، قراردادِ لاہور مسلماناں کوں او عزم بخشا جو محض ست سال دی تھوڑی مدت وچ 14 اگست 1947 کوں ساݙے آباؤ اجداد قائدِ اعظم محمد علی جناح دی بصیرت افروز قیادت اچ ہک علیحدہ وطن پاکستان حاصل کرݨ وچ کامیاب تھئے۔ وزیرِ اعظم آکھیا جو بلاشبہ مملکتِ خداداد پاکستان دی صورت اچ آزادی دی ایہ نعمت ساݙے اسلاف دے تدبر، عزم، استقامت تے قربانیاں دا منہ بولیندا ثبوت اے۔وزیرِ اعظم آکھیا جو قیامِ پاکستان دے بعد اپنی پروقار تاریخ اچ اساݙی قوم ہر آزمائش وچ غیر معمولی جذبے تے عزم و ہمت دا مظاہرہ کیتے۔  ٻہوں سارے چیلنجاں دے باوجود، الحمدللہ، اساں پاکستان دی معیشت کوں پائیدار ترقی دی راہ تے لا ݙتے۔ افراطِ زر دی شرح اچ مسلسل کمی، سرمایہ کاراں دے اعتماد وچ اضافہ تے مثبت اقتصادی اشاریے درست سمت دا ثبوت ہن۔ کامیابی دا اے سفر، جرات مندانہ اصلاحات تے دانشمندانہ حکمتِ عملی دے نال نال عوام دے اپنی صلاحیتاں تے وطنِ عزیز دے روشن مستقبل تے اعتماد دے مرہونِ منت اے۔وزیرِ اعظم یاد ݙوایا جو ایں سال 26 فروری 2026 دی رات ساݙی سرحداں تے طالبان غاصب ٹولے دی بلا اشتعال جارحیت دا جواب آپریشن غضبِ للحق دے ذریعے ݙتا گیا۔ آپریشن غضبِ للحق محض عسکری کارروائی کائنی بلکہ دہشت گردی دے خلاف قومی عزم دی علامت اے کہ اساں کہیں صورت ملک دے امن تے تحفظ تے آنچ کائنی آوݨ ݙیسوں۔ وزیرِ اعظم آکھیا جو پاکستان فلسطینی بھراواں نال وی مکمل اظہارِ یکجہتی کریندے تے مشرقِ وسطیٰ وچ حالیہ کشیدگی تے وی گہری تشویش رکھیندے۔ پاکستان ہک ذمہ دار عالمی ریاست دے طور تے متوازن تے فعال سفارت کاری جاری رکھے ہوئے اے، جیندے مرکز علاقائی استحکام، مکالمہ تے باہمی احترام اے۔ پاکستان ایں ڳالھ تے یقین رکھیندے جو مذاکرات ہی پائیدار امن دا راستہ ہن۔وزیرِ اعظم آکھیا جو یومِ پاکستان دے موقع تے اساں تحریکِ پاکستان دے قائدین تے کارکنوں دی لازوال خدمات کوں پرخلوص خراجِ تحسین پیش کریندے ہئیں (اے)۔ تے افواجِ پاکستان تے قانون نافذ کرݨ والے اداریاں دے بہادر افسراں تے دلیر جواناں کوں وی سلام پیش کریندے ہئیں جنھاں ملک دی آزادی، خود مختاری تے سلامتی دے تحفظ کیتے اپنی جاناں دے قیمتی نذرانے پیش کیتے۔ پوری قوم اپنی تابندہ روایتاں کوں سربلند رکھݨ کیتے پرعزم تے کہیں وی آزمائش دا سامنا کرݨ کیتے ہر ویلے تیار اے۔انھاں آکھیا جو اللہ تعالیٰ پاکستانی قوم کوں بے پناہ صلاحیتاں نال نوازے جیڑھیاں ملک کوں ترقی دی بلندیاں نال ہمکنار کریسن۔ دور رس حکمتِ عملی، موثر پالیسی، مخلصانہ کوششاں تے قومی اتحاد نال اساں اقوامِ عالم وچ او مقام حاصل کر سڳدے ہئیں جیندے خواب بانیانِ پاکستان ݙیکھے ہن۔ پرعزم تے متحد قوم جݙݨ ہک مقصد کیتے ݙٹ ونڄے تاں اوندی اڳوں کوئی چیلنج ناقابلِ تسخیر کائنی رہندا۔ اساں لازوال جذبے، انتھک محنت تے مشترکہ جدوجہد دے نال مضبوط، خوشحال تے ترقی یافتہ پاکستان دی تعمیر جاری رکھسوں۔