روس اتے یوکرین وچال فوری جنگ بندی اتے بامعنی مذاکرات دا پاکستانی مطالبہ

نیویارک:24 مارچ(اے پی پی)پاکستان روس اتے یوکرین وچال فوری جنگ بندی اتے امن مذاکرات دی تکھے بحالی دا مطالبہ کریندے زور ݙتے جو ایں مسئلے دا کوئی فوجی حل کائنی۔ اے ڳالھ اقوامِ متحدہ اچ پاکستان دے مستقل مندوب عاصم افتخار احمد سلامتی کونسل اچ یوکرین دی صورتحال تے تھیوݨ آلی بحث اچ آکھی۔ روس اتے یوکرین دی جنگ پنجویں سال اچ ویندی پئی اے۔ پاکستانی مندوب آکھیا جو ہک منصفانہ اتے دیرپا امن صرف مسلسل، منظم اتے بامعنی مذاکرات نال ہی مل سڳدے، پاکستان ایں جنگ دے شروع توں ہی ڳالھ مہاڑ تے سفارت کاری دی حمایت کیتی اے کیوں جو ایں جنگ لوکاں، انہاں دی معیشت، ملکاں اتے پورے خطے کوں ٻہوں ضائع کیتے، ایں لمبی جنگ عالمی ونڈ کوں ودھائے، بین الاقوامی نظام کوں کمزور کیتے اتے پرامن حل دی کوششاں کوں اوکھا کر ݙتے۔ انہاں آکھیا جو عام شہری ایں جنگ دا سب توں ودھ چیندے پئن، جنہاں دا جانی نقصان تھیندا پئے اتے او بے گھر تھیندے پئن۔ انسانی ہمدردی پاروں ضروری اے جو شہریاں دی حفاظت اتے پرامن حل کوں ترجیح ݙتی ونڄے۔ پاکستانی مندوب امید کیتی جو مذاکرات دا اڳلا دور تکھے شروع تھیسی۔ پاکستان یقین ݙوایا جو او عالمی سطح تے جھیڑیاں دے پرامن حل، بین الاقوامی قانون اتے اقوامِ متحدہ دے اصولاں دی حمایت جاری رکھیسی۔