سعودی عرب اتے ایندے عوام نال کھڑے ہیں، وزیر اعظم شہبازشریف دی سعودی ولی عہد نال ڳالھ مہاڑ

اسلام آباد۔ 25 مارچ(اے پی پی) وزیر اعظم محمد شہباز شریف سعودی قیادت کوں سارے فریقین تئیں پاکستان دی تعمیری سفارتی رسائی بارے اعتماد اچ ڳھندے ہوئے موجودہ بحران اچ سعودی عرب دے غیر معمولی تحمل دی تعریف کریندے یقین ݙیوایا جو پاکستان ہمیشہ سعودی عرب اتے ایندے عوام نال کھڑا رہسی۔ پی ایم آفس دے میڈیا ونگ توں جاری بیان دے مطابق وزیر اعظم محمد شہباز شریف سعودی عرب دے ولی عہد شہزادہ محمد بن سلمان بن عبدالعزیز آل سعود نال ٹیلی فون تے ڳالھ مہاڑ کیتی۔ بیان دے مطابق وزیراعظم محمد شہباز شریف خادمین الحرمین الشریفین شاہ سلمان بن عبدالعزیز آل سعود، ولی عہد شہزادہ محمد بن سلمان اتے سعودی عرب دے عوام کوں عید الفطر دی دلی مبارکباد ݙتی۔ سعودی ولی عہد شہزادہ محمد بن سلمان وی وزیراعظم محمد شہباز شریف کوں عید دی مبارکباد ݙتی اتے نیک خواہشات پچائن۔ وزیراعظم سعودی عرب اتے حالیہ حملیاں دی پاکستان ولوں شدید مذمت دا اعادہ کریندے ہک واری ول ایں اوکھے ویلھے اچ مملکت اتے اوندے عوام کیتے پاکستان دی مکمل یکجہتی اتے حمایت دا اظہار کیتا۔ موجودہ بحران اچ غیر معمولی تحمل ݙکھاوݨ تے مملکت دی قیادت دی تعریف کریندے وزیراعظم آکھیا جو پاکستان ہمیشہ مملکت سعودی عرب اتے ایندے بھرا عوام نال کھڑا رہسی جنہاں ہمیشہ پاکستان دی حمایت کیتی اے۔ وزیراعظم محمد شہباز شریف فوری طور تے جنگ مکاوݨ اتے صورت حال دے معمول تے آوݨ تے زور ݙتا تاں جو علاقائی صورتحال کوں مستحکم کیتا ونڄ سکے۔ انہاں امت دیاں صفاں اچ اتحاد اتے ہم آہنگی تے زور ݙتے جیندی پہلے توں ودھ لوڑھ اے۔ انہاں سعودی ولی عہد کوں سارے فریقین تئیں پاکستان دی تعمیری سفارتی رسائی دا ݙسایا جیندے اچ کشیدگی کوں گھٹ کرݨ اتے اختلافات کوں مذاکرات اتے سفارت کاری نال حل کرݨ تے زور ݙتا ڳئے۔ سعودی ولی عہد پاکستان دیاں امن کوششاں کوں سراہیا۔ ݙوہاں رہنماواں ݙوطرفہ ہر سطح تے قریبی رابطہ برقرار رکھݨ تے اتفاق کیتا۔