سپین اچ مقیم پاکستانیاں کیتے وݙا ریلیف، ریذیڈنٹ کارڈ کیتے پاسپورٹ اتے دستاویزات ہفتے اچ جاری کرݨ دا فیصلہ

اسلام آباد۔ 25 مارچ(اے پی پی) وفاقی حکومت سپین اچ مقیم پاکستانیاں کوں قانونی حیثیت ݙیواوݨ کیتے ہنگامی بنیاد تے اقدامات دا فیصلہ کیتے۔ وفاقی وزیر داخلہ محسن نقوی اتے وفاقی وزیر برائے اوورسیز پاکستانیز سالک حسین دی زیر صدارت اعلیٰ سطح اجلاس اچ فیصلہ کیتا ڳئے جو سپینش ریذیڈنٹ کارڈ دے حصول کیتے پاکستانیاں کوں پاسپورٹ اتے ٻیاں ضروری سفری دستاویزات دی فراہمی ہک ہفتے اچ یقینی ٻݨائی ویسی۔ سپین اچ غیر قانونی تارکین وطن کوں قانونی حیثیت ݙیوݨ کیتے رجسٹریشن دے آغاز توں پہلے سارے متعلقہ کاغذات اتے پاسپورٹ ہک ہفتے اچ جاری کیتے ویسن۔ وزیر داخلہ محسن نقوی سپین اچ پاکستانی سفارت خانے دے پاسپورٹ سیکشن کیتے فوری طور تے اضافی عملہ ݙیوݨ دی ہدایت کیتی، جتھاں پاسپورٹ دے تیکھے اجرا کوں ترجیح ݙتی ڳئی اے اتے واضح کیتا ڳئے جو کہیں وی مجرم یا مطلوب ملزم کوں پاسپورٹ ہرگز جاری نہ تھیسی۔ نیشنل پولیس بیورو ولوں کریکٹر سرٹیفکیٹ دی تصدیق دے عمل کوں سوکھا اتے تیز کر ݙتا ڳئے تاں جو تارکین وطن کوں تاخیر دا سامݨا نہ کرݨا پووے۔ وزیر اوورسیز پاکستانیز سالک حسین ݙسایا جو سپین دی ایں سکیم توں تقریباً 15 ہزار پاکستانی فیدہ چیسن، انہاں سمندر پار پاکستانیاں دی معاونت تے وزارت داخلہ دے تعاون کوں سراہیا اتے شکریہ ادا کیتا۔ اجلاس اچ وزیر مملکت برائے داخلہ طلال چوہدری، وفاقی سیکرٹریز، ڈی جی ایف آئی اے اتے نادرا حکام وی شرکت کیتی۔ سپین اچ پاکستان دے سفیر ڈاکٹر ظہور احمد اتے قونصل جنرل بارسلونا محمد علی وزیر بذریعہ زوم بریفنگ ݙیندے ݙسایا جو 10 ہزار لوکاں کوں اتھارٹی لیٹرز جاری تھی چکین، سارے ادارے دستاویزات دی ویلھے سر فراہمی کیتے مربوط انداز اچ کم کریندے پئن۔ اناں دا آکھݨ ہئی جو کریکٹر سرٹیفکیٹ اتے پاسپورٹ دے اجرا دی رفتار ٻہوں ودھی اے۔