وزیراعظم شہباز شریف نال چینی سفیر دی ملاقات

اسلام آباد۔26 مارچ(اے پی پی) وزیراعظم محمد شہباز شریف زراعت، صنعتی تعاون اتے بنیادی ڈھانچے دے اہم منصوبیاں تے توجہ رکھیندے ہوئیں سی پیک 2.0 کوں اڳو تے ودھاوݨ دا عزم دوہریندے چین نال قریبی تعلقات جاری رکھݨ تے زور ݙتے۔ وزیراعظم محمد شہباز شریف نال چینی سفیر جیانگ زیڈونگ وزیراعظم ہاؤس اسلام آباد اچ ملاقات کیتی۔ وزیراعظم آفس دے میڈیا ونگ ولوں جاری بیان دے مطابق ایں موقع تے نائب وزیراعظم اتے وزیر خارجہ سینیٹر محمد اسحاق ڈار، وزیراعظم دے معاون خصوصی سید طارق فاطمی اتے سیکرٹری خارجہ وی موجود ہن۔ وزیراعظم “ٹو سیشنز” دے کامیاب ہووݨ تے چینی قیادت کوں مبارکباد ݙتی۔ وزیراعظم صدر شی جن پنگ، وزیراعظم لی کیانگ اتے وزیر خارجہ وانگ یی دا یومِ پاکستان تے نیک خواہشات بھیجݨ تے شکریہ ادا کیتے۔ چین دی مستحکم معاشی حمایت دی تعریف کریندے ہوئیں وزیراعظم زراعت، صنعتی تعاون اتے بنیادی ڈھانچے دے اہم منصوبیاں تے توجہ رکھیندے ہوئیں سی پیک ٹو کوں اڳو تے ودھاوݨ کیتے پاکستان دے عزم کوں دوہرائے۔ چینی سفیر جیانگ پاکستان دی معاشی بہتری اتے اصلاحات دی کوششاں دی تعریف کیتی اتے چین ولوں تجارت اتے سرمایہ کاری اچ تعاون دا اعادہ کیتا۔ انہاں سفارتی تعلقات دی 75 ویں سالگرہ دے موقع تے اعلیٰ سطح دے رابطیاں کوں ودھاوݨ دا عزم دوہرایا۔ وزیراعظم علاقے دی صورتحال تے ڳالھ کریندے ہوئیں کشیدگی گھٹ کرݨ اتے علاقائی استحکام کوں ودھاوݨ اچ پاکستان دے کردار کوں واضح کیتا۔ وزیراعظم آپسی دلچسپی دے معاملیاں تے قریبی رابطہ جاری رکھݨ تے زور ݙتے اتے پاک چین آل ویدر اسٹریٹجک کوآپریٹو پارٹنرشپ کوں ٻیا تکڑا کرݨ دے عزم دا اعادہ کیتا